Diuxi ni riguixhedxí
Ni gudixhe xaique xtiꞌ ca binni ruundaꞌ, ra xhidxi ca yagalé. Guendaruundaꞌ diidxaguieꞌ ne diidxariuundaꞌ rusisacanécabe Diuxi ni bicaa Asaf.
76
Runibiáꞌcabe Diuxi Judá;nabé zaꞌbiꞌ xtiidxaꞌ guidubi Israel.
2 Yuꞌduꞌ xtibe zuba ique dani Sión,
ni nuu Jerusalén;
3 raqué gulúzabe ca xquiibaꞌ guendaridinde:
ca escudu, ca guiibaꞌ duxhuꞌ, ca baza ne ca bazandíꞌ.
4 ¡Aque nandxoꞌloꞌ, xa Diuxi!
¡Jma nandxoꞌloꞌ que ca dani ni qué gapa dxi gunitilú!
5 Ca ni ná jma beedxeꞌ laa la? bisixieecabe laacaꞌ;
ca ni jma nadipaꞌ la? qué ñanda ñúnicaꞌ gastiꞌ;
¡biluxe xpacaandacaꞌ gúticaꞌ!
6 Qué lica peꞌ randa riniibi maniꞌ ne ca luunarutubi
dxi lii, Diuxi xtiꞌ Jacob, rucoou ridxi naduxhuꞌ.
7 ¡Lii naduxhuluꞌ!
Tuu ndiꞌ zanda guzuhuaa neza luluꞌ
ora nuuluꞌ xiana.
8 Dede guibáꞌ rusuhuíniluꞌ ora caguu biaꞌluꞌ xtonda binni;
ridxibi guidxilayú dede rata dxí,
9 ay Diuxi,
zacá raca dxi lii guiasaluꞌ para guꞌnuꞌ jneza,
ne gulaluꞌ guiráꞌ ca ni caxii ndaaniꞌ guidxilayú diꞌ.
10 Xiana xtiꞌ binni rácani ti guendarisaca xtiuꞌ;
¡dede xiana jma nandahui xtiꞌ binni rácani ti laꞌpaꞌ xtiuꞌ!
11 Guiráꞌ ni gudii xtiidxatu Tata Diuxi, Diuxi ni bizáꞌ laatu,
laguni ni.
Laatu, ca ni riguutu leꞌ ni naquiiñeꞌ guidxíbitu laa,
¡latané xindxaa guicaabe!
12 Ti laabe ráxhabe xquendanabani ca xaique
ne ruchibibe ca xaique roꞌ xtiꞌ guidxilayú.