Diuxi nga xaique ni runi jneza
Ni gudixhe xaique xtiꞌ ca binni ruundaꞌ. «No destruyas». Guendaruundaꞌ diidxaguieꞌ ne diidxariuundaꞌ rusisacanécabe Diuxi ni bicaa Asaf.
75
Xquixe peꞌ lii Diuxi,xquixe peꞌ lii;
rucáꞌ ruaaduꞌ láluꞌ ne ridúꞌndadu ca guendaridxagayaa xtiuꞌ.
2 Sica riꞌ ná Tata Diuxi:
«Dxi ni cuéꞌ,
zuguaabiaꞌyaꞌ donda ne guendadxandíꞌ.
3 Ora guiniibidxacha guidxilayú, ne guiráꞌ ni nabeza ndaaniꞌ ni,
naa nga rinaazeꞌ dxicheꞌ ñeeni.»
4 Ca ni ruchá bi yanni ne ca ni nadxabaꞌ, rabeꞌ laacaꞌ:
«Cadi gácatu nayáꞌ ne guchatu guendanaróꞌ xtitu;
5 cadi tan guchachaladitu
ne lagutopa ruaatu para guiniꞌtu.»
6 Guendarisaca cadi zeeda diꞌ ni
neza rindani gubidxa nin ca neza riaaziꞌ gubidxa,
ne laaca cadi zeedani lu layú dachi ninca lu dani,
7 Diuxi si nga riguu biaꞌ donda;
laabe maꞌ nánnabe tu gudxiibabe ne tu quiñentaabe.
8 Tata Diuxi naaze ti xiga ra daꞌ xiana xtiꞌ,
nápani vino nuchaꞌ naíꞌ.
Dxi laabe guxhiibe ni,
guiráꞌ binni nadxabaꞌ nuu ndaaniꞌ guidxilayú diꞌ
zeꞌ diticani de ra gucuiidxicani.
9 Naa nabé zuzeeteꞌ Diuxi xtiꞌ Jacob,
ne susisacaꞌ laabe ne diidxariuundaꞌ;
10 ti laabe zunidebe guendanayáꞌ xtiꞌ ca binni nadxabaꞌ,
ne zutalebe stipa xtiꞌ ca binni nachaꞌhuiꞌ.