Ndaayaꞌ ra canábacabe guilá guidxi
Diidxaguieꞌ bicaa Asaf.
74
Ay Diuxi,xiñee bisaana couꞌ laadu pue.
Xiñee cadxichineuꞌ
ca dendxuꞌ ni nuu lu layú xtiuꞌ.
2 Bietenalaꞌdxiꞌ ca xpínniluꞌ,
ni gucoouꞌ dede dxi bizuluneuꞌ laacaꞌ,
ca ni bilaluꞌ para guꞌnuꞌ laacaꞌ xpínniluꞌ;
bietenalaꞌdxiꞌ dani Sión ra huabezaluꞌ que.
3 Gudáꞌ guꞌyuꞌ ca yoo bixá zeꞌ daabi diꞌ;
¡ca ni nanalaꞌdxiꞌ laanu binidé guiráꞌ ni nuu ndaaniꞌ yuꞌduꞌ!
4 Ca ni nanalaꞌdxiꞌ lii cayuundacaꞌ nayecheꞌ ndaaniꞌ yuꞌduꞌ xtiuꞌ;
¡maꞌ bigaandacaꞌ larindxóꞌ xticaꞌ
5 ruaa ndaga yoo!
Casi ñácacaꞌ binni rutopa yaga
galahuiꞌ ti guiꞌxhiꞌ xhii,
6 ne jacha ne martíu
bixuuxecabe guiráꞌ yaga ruzuchaahuine.
7 Gudixheguícabe yuꞌduꞌ xtiuꞌ;
¡qué ñusisácacabe yuꞌduꞌ xti piouꞌ,
gudiñentaacabe ni layú!
8 Guníꞌ íquecabe gunitilúcabe laadu;
¡bizaaquicabe guiráꞌ ca yuꞌduꞌ huiiniꞌ nuu ndaaniꞌ guidxi
ra ridxíñadu para ganaxhiidu lii!
9 Maꞌ qué ridúꞌyadu larindaayaꞌ xtidu;
maꞌ qué lica rihuini nin ti profeta,
ne laadu qué gannadidu padxí guiluxe guiráꞌ ndiꞌ.
10 Ay Diuxi,
tica padxí ndiꞌ guidaaguꞌ ruaa ca ni nanalaꞌdxiꞌ laadu.
Tica padxí ndiꞌ gusaanacabe guiníꞌcabe lii.
11 Xiñee ndiꞌ riguꞌbaꞌ náꞌ ndaayaluꞌ.
Xiñee ndiꞌ guidxinaluꞌ.
12 Dede maꞌ xadxi nga, lii nacuꞌ Xaique roꞌ xtinneꞌ.
Ay Diuxi, lii bíꞌniluꞌ stale guendanandxóꞌ
ndaaniꞌ guidxilayú riꞌ;
13 ne stipa xtiuꞌ biꞌnuꞌ nisadóꞌ chupa ndaa,
ne gundoouꞌ ique ca maniꞌ duxhuꞌ nuu ndaaniꞌ ni,
14 lii nga bicaacheluꞌ ca ique maniꞌ duxhuꞌ ni rábicabe Leviatán que,
ne biyaanaluꞌ xpeelame ca maniꞌ duxhuꞌ ni nuu ndaaniꞌ ca layú dachi.
15 Lii bisindániluꞌ nisa ne guiiguꞌ,
ne bicuuidxiluꞌ ca guiiguꞌ roꞌ ni qué nusiaadxaꞌ nisa.
16 Lii nga xpixuaanaꞌ dxi ne xpixuaanaꞌ gueelaꞌ;
lii bicoou beeu ne gubidxa;
17 lii gudíxheluꞌ ra guiluxe guidxilayú;
lii bizouꞌ gusiguié ne gusibá.
18 Gunnadxichi, Tata Diuxi, ca ni nanalaꞌdxiꞌ lii runiná ladxidoꞌloꞌ,
ne nuu binnihuati riníꞌ lii.
19 ¡Ne biiyaꞌ qué chigusiaanducouꞌ laadu!
Laadu natendedu casi guugu huiiniꞌ;
¡cadi gugaasuꞌ laadu ruaa ca maniꞌ duxhuꞌ!
20 ¡Bietenalaꞌdxiꞌ ni bidii xtiidxaluꞌ laadu,
purtiꞌ guidxilayú diꞌ nuu naxoo
dede ra riluxe!
21 Cadi gusaanuꞌ gusutuícabe lú ca ni caxii;
¡biꞌniꞌ ganaxhii binni chibaꞌ ne binni nazíꞌ lii!
22 ¡Ay Diuxi, biasa! ¡Bicueeza ruaa ca ni riníꞌ lii ca!
¡Bietenalaꞌdxiꞌ ca binnihuati rulaa diidxaꞌ lii gatigá!
23 Qué chi gusiaandaluꞌ ridxi xtiꞌ ca ni nanalaꞌdxiꞌ lii,
ne yaya xtiꞌ ca ni riasa luguialuꞌ.