Guendanachaꞌhuiꞌ xtiꞌ Diuxi
Guendaruundaꞌ diidxaguieꞌ bicaa Asaf.
73
¡Aque nachaꞌhuiꞌ Diuxi ne ca binni xtiꞌ Israel xa,ca ni nayá ladxidóꞌ!
2 Xcaadxi huiiniꞌ si ñabaꞌ;
biaꞌ qué nuxhooñeꞌ si ñeeꞌ.
3 Bianaladxeꞌ ra biiyaꞌ cadale xpidxichi
ca binni nadxabaꞌ ne ca ni ruchá bi yanni.
4 Laacabe qué rizaaláꞌdxicabe guendaguti,
nazaacadxichicabe yaꞌ;
5 qué gánnacabe yuubaꞌ xtiꞌ guidxilayú,
ne qué huadíꞌdicabe ra nagana casi guiráꞌ binni.
6 Ngue runi guendaruchá bi yanni nga xpigáꞌcabe
ne xhábacabe nga guendanaxoo;
7 riroo xhaatacabe biaꞌ qué guiree yande si guielúcabe,
ne nabé stale guendanadxabaꞌ ni ricá íquecabe.
8 Rugaandacabeꞌ, ruchácabe bi yannicabe ne nin ripipi ra lágacabe,
riníꞌcabe zúnicabe guendanadxabaꞌ ne guendanaxoo;
9 rucaalúcabe guibáꞌ ne ruaacabe,
ne riguiñe lúdxicabe guidxilayú.
10 Nga nga runi ruchá binni naróꞌ xtícabe,
ne qué ridxela ra quiñeyú laacabe.
11 Rinabaꞌ diidxacabe:
«Zanna xa Diuxi ni.
Zuuya xa Diuxi ni nadxóꞌ ni.»
12 ¡Laguuyaꞌ ca binni nadxabaꞌ diꞌ!
Zacá si cutálecaꞌ xpidxíchicaꞌ.
13 ¡Abatiꞌ zaquiiñeꞌ naa gapaꞌ ladxiduaꞌyaꞌ nayá
ne quiibeꞌ nayáꞌ de guiráꞌ guendanadxabaꞌ!
14 Tí gatigá cadiiñeꞌ,
ne cayuninácabe naa guiráꞌ siadóꞌ.
15 Pa ñaca casi xquendabiaanicabe xquendabiaaneꞌ la?
maꞌ nudxieeꞌ decheꞌ ca xiiñuꞌ.
16 Gucaladxeꞌ ñeneꞌ ndiꞌ,
huaxa nabé nagana gucani para naa.
17 Beeda guieneꞌ ni dxi biuaaꞌ ndaaniꞌ yuꞌduꞌ xtiꞌ Diuxi,
raqué nga gunnaꞌ paraa nga chécabe;
18 ruaa bandaa nga bizuhuaaluꞌ laacabe,
ne rulaanouꞌ laacabe guiábacabe.
19 ¡Ti lu bi si zacadécabe!
¡Zunduuxeꞌ dxiibi laacabe!
20 Dxi guiásaluꞌ la? Tata Diuxi,
casi ora riasa tuuxa lu bacaandaꞌ,
zaguiñeyuluꞌ xquendacabe.
21 Bindáꞌ xhaataꞌ ladxiduáꞌ
dede bidu yuubaꞌ ni,
22 purtiꞌ nahuateꞌ qué rieneꞌ;
¡sica ti maniꞌ nga naa neza luluꞌ!
23 Neca zacá ni, naa qué nireechuáꞌ de lii.
Lii gunaazuꞌ nayaꞌ neza ndigaꞌa,
24 huasiéneluꞌ naa ne ca xtiidxaluꞌ
tí dxi guidxiña dxi ganda guidxagaluluꞌ naa guibáꞌ.
25 Tuu ndiꞌ napaꞌ guibáꞌ yaꞌ.
¡Pa cadi lii!
Pa nuuluꞌ cueeꞌ la? maꞌ qué racaladxeꞌ gastiꞌ lu guidxilayú.
26 Guidubi nacaꞌ cayá,
peru Diuxi nga ribezaꞌ dxi ne gueelaꞌ
laabe nga naazebe ladxiduáꞌ.
27 Ca ni guixaleꞌ de lii la? záticaꞌ;
ne zunideluꞌ ca ni gudxiideche lii.
28 Naa la? zadxiñaꞌ ra nuu Diuxi xa,
tí laabe nga ni jma sicarú nuu.
Tata Diuxi, lii nga rápaluꞌ naa,
naa zudieeꞌ diidxaꞌ guiráꞌ ni huayuꞌnuꞌ.