Ra canábacabe Diuxi guꞌyaꞌ xaique roꞌ
Ni bicaa Salomón.
72
Ay Diuxi, bidii xaique roꞌ xtidu,guendaruni jneza ne guendahuandíꞌ xtiuꞌ,
2 tí gápabe ne guendabiaaniꞌ
ca xquídxiluꞌ ne ca binni nazíꞌ xtiluꞌ.
3 Ca dani ne ca guiꞌxhiꞌ gudiicaꞌ
ti dxidóꞌ ne ti guendahuandíꞌ guicaa guidxi.
4 ¡Guni xaique roꞌ jneza ne ca binni nazíꞌ!
¡Gulabe xiiñiꞌ ca binni ni qué gapa gastiꞌ,
ne guxhatañeebe ca binni ni cayanináꞌ laacabe!
5 ¡Laga cuzaaniꞌ gubidxa ne beeu la?
guidxibi xaique roꞌ lii dxi ne gueelaꞌ!
6 ¡Gácabe casi ti nisaguié dé ne gupa
ni ruzee guidxilayú ne guixiyaa!
7 ¡Laga nácabe xaique
chuꞌ guendariuu dxi ne guendaruni jneza,
ne zacá gácani dede ra maꞌ qué chuu dxi guzaaniꞌ beeu!
8 ¡Gácabe xaique dede lu ti nisadóꞌ ne sti nisadóꞌ
dede ra ruzulú guiiguꞌ Éufrates ne de ra riluxe guidxilayú!
9 ¡Ca ni nanalaꞌdxiꞌ laabe, ca ni nabeza lu ca layú dachi,
guiabaxíbicaꞌ xañeebe!
10 ¡Gueeda ca xaique xtiꞌ Tarsis ne ca xaique xtiꞌ ca layú ni nuu galahuiꞌ nisa,
ne gueeda ca xaique xtiꞌ Sabá ne Sebá,
gueedanecaꞌ xindxaa gudiicaꞌ laabe!
11 ¡Dede guiráꞌ xixé ca xaique roꞌ guzuxibicaꞌ xa ñeebe!
¡Ne guiráꞌ guidxi roꞌ guni xhiiñabe!
12 Tí laabe zulabe binni nazíꞌ ni guinabaꞌ gacanebe laa,
laaca zacanebe ca ni qué gapa guirutiꞌ tu guꞌyaꞌ laa.
13 Ziabe ca binni qué gapa gastiꞌ,
ne zulabe ca binni ni nazíꞌ xquendanabani.
14 Zulabe laacaꞌ ra cuxhiicabe laacaꞌ ne lu guendanaxoo,
tí rusisácabe xquendanabanicaꞌ.
15 ¡Qué chuꞌ dxi gatiꞌ xaique roꞌ!
¡Gudiicabe laabe ca oro xtiꞌ Sabá!
¡Naquiiñeꞌ guinábanu Diuxi gapaꞌ laabe!
¡Ne gudii laabe ndaayaꞌ xtiꞌ!
16 ¡Chuꞌ stale xubaꞌ ndaaniꞌ guidxilayú,
ne guidalecani ique ca dani!
¡Guindani biní casi rindani Líbano,
ne gápani stale guela casi rindani guixiyaa ndaaniꞌ guiꞌxhiꞌ!
17 ¡Qué chuꞌ dxi guiaandaꞌ lá xaique roꞌ;
guizaabiꞌ xtiidxabe dede dxi gatiꞌ gubidxa!
¡Guiráꞌ guidxi nuu ndaaniꞌ guidxilayú
chuꞌcaꞌ ndaayaꞌ runi laabe!
¡Guiráꞌ ca guidxi roꞌ ca gabi laabe nayecheꞌ!
18 Aque nandxóꞌ nga Tata Diuxi, Diuxi xtiꞌ Israel,
tobi lucha ni runi guendanandxóꞌ;
19 qué guiaanadxí de guisaca lá nandxóꞌ xtibe.
¡Tí guidxá guidxilayú de ndaayaꞌ xtibe!
¡Zacá gácani!
20 Raríꞌ riluxe ca ndaayaꞌ xtiꞌ David xiiñiꞌ Jesé.