Diidxaꞌ ndaayaꞌ xtiꞌ binnigola
71
Tata Diuxi, lii nga ruyubeꞌ gulaluꞌ naa;¡qué chuꞌ dxi gudxiidechuꞌ naa!
2 ¡Bilá naa, gupa naa,
tí lii nga ruꞌnuꞌ jneza!
Bicaadiaga laꞌ naa, ne bilá naa.
3 Guca ti guie roꞌ ni gulá naa,
¡guca ti yoo roꞌ ra gucacheluáꞌ ne ra guiaapaꞌ!
¡Tí lii nga guie roꞌ ne yoo roꞌ xtinneꞌ!
4 Diuxi ni bizáꞌ naa,
gulee naa de lu náꞌ ca binni nadxabaꞌ,
lu náꞌ ca ni huayuutiꞌ ne ca ni naduxhuꞌ,
5 tí lii, Tata Diuxi, dede dxi gucaꞌ baꞌdunguiiu huiiniꞌ,
lii nga ribezaꞌ ne lii nga rápaluꞌ naa.
6 Dede dxi naa nuaaꞌ ndaaniꞌ jñaa la?
maca ca luáꞌ lii.
¡Runi lii guleꞌ!
¡Naa zusisacaꞌ lii lu guidubi guendanabani xtinneꞌ!
7 Stale tu ridxagayaa naa,
huaxa ra nuuluꞌ nga riaapaꞌ.
8 Guiráꞌ dxi nga ridxá tipa ruaaꞌ
de ndaayaꞌ xtiluꞌ;
9 qué chi gucaanaluꞌ naa dxi maꞌ gaca binnigola;
qué chi gusaanuꞌ naa dxi maꞌ birá stipa xtinneꞌ.
10 Ca ni nanalaꞌdxiꞌ naa, ca ni nuu guuti naa la?
maꞌ bidaagucaꞌ ne guníꞌ xtiidxacaꞌ xi gúnicaꞌ naa.
11 Nacaꞌ:
«¡Lazánanda laabe, laguinaazeꞌ laabe,
maꞌ bisaana Diuxi laabe
ne maꞌ guirutiꞌ tu gulá laabe!»
12 Diuxi ni bizáꞌ naa, qué chi guixelediouꞌ de naa;
¡gudáꞌ nagueenda gucané naa!
13 ¡Guituí lú ne gatiꞌ
ca ni nanalaꞌdxiꞌ xquendanabaneꞌ!
¡Guituí lú
ca ni nuu guꞌyaꞌ naa guiabantaꞌyaꞌ!
14 Huaxa naa zabezaꞌ lii guiráꞌ dxi,
ne jma ruꞌ si zusisacaꞌ lii;
15 guiráꞌ dxi ruaaꞌ zuzeeteꞌ
lii nga bilaluꞌ laadu ne lii nga biꞌnuꞌ jneza ne laadu.
¡Naa qué rienediáꞌ xiñee!
16 Zuéꞌ guiráꞌ guendanandxóꞌ ni huayuꞌnuꞌ Tata Diuxi;
¡zaniéꞌ lii tiꞌ nga ruꞌnuꞌ jneza!
17 Diuxi ni bizáꞌ naa,
dede dxi gucaꞌ baꞌdunguiiu huiiniꞌ la? lii bisiiduꞌ naa,
ne dede yanna ruzeeteruáꞌ guiráꞌ guendanachaꞌhuiꞌ ni biꞌnuꞌ.
18 Neca maꞌ nagolaꞌ ne maꞌ natoopeꞌ iqueꞌ,
qué chi gusaanudiouꞌ naa Tata Diuxi,
naa naparuáꞌ stale xtiidxaluꞌ güeniáꞌ
ca binni ni nabani yanna diꞌ ne ca ni chigale ruꞌ.
19 Guendanachaꞌhuiꞌ xtiluꞌ, ay Diuxi, dede guibáꞌ nga rindá ni;
ne lii maꞌ biꞌnuꞌ jma guendanandxóꞌ;
¡ne gastiꞌ ruꞌ stobi casi lii!
20 Neca hualuiꞌluꞌ naa
stale guendanazíꞌ ne guendaxizaa,
susibanirouꞌ naa;
zabeeuꞌ naa de ra jma gueteꞌ guidxilayú,
21 zutáleluꞌ guendanandxóꞌ xtinneꞌ
ne zazaca rouꞌ naa.
22 Ne naa la?
zuundaniáꞌ arpa ne salteriu,
saa ra gusisacaꞌ nayá xtiidxaluꞌ ne tobi si nga ladxidoꞌloꞌ,
Diuxi ni bizáꞌ naa, bidóꞌ xtiꞌ Israel.
23 Dede nayecheꞌ ziuu ruaaꞌ ra guundaꞌ saa xtiluꞌ,
laca zaqueca guidubinaca naa, tí lii bilaluꞌ naa.
24 Ne laaca guidubi dxi zaniéꞌ
lii nga ruꞌnuꞌ jneza,
ti ca ni gucalaꞌdxiꞌ ñuuyaꞌ guendanazíꞌ xtinneꞌ la?
gucacaꞌ stuí.