Ti ridxi xtiꞌ xizaa
Ni gudixhe xaique xtiꞌ ca binni ruundaꞌ, sica rixidxi saa xtiꞌ «Los lirios». Ni bicaa David.
69
Bilá naa, Diuxi ni bizáꞌ naa,maꞌ yaca si gateꞌ guiiguꞌ;
2 cayaazeꞌ ndaaniꞌ ti gueꞌlaꞌ beñe,
ne qué guidxelaꞌ paraa guzuhuaañeeꞌ.
Maꞌ bidxiñaꞌ ra jma ziaꞌni ne caxubiyú xtípani naa.
3 Maꞌ gulaa yanneꞌ ti cayuneꞌ ridxi;
dede maꞌ naná ndaaniꞌ yanneꞌ;
¡maꞌ ca dxí si luáꞌ
runi cabezaꞌ Diuxi ni bizáꞌ naa!
4 Jma stale ca ni nanalaꞌdxiꞌ naa sin guneꞌ laaca gastiꞌ
que ca guicha iqueꞌ;
maꞌ bidale ca ni nanalaꞌdxiꞌ naa,
ca ni nuu guxhatañee naa sin ñuneꞌ laaca gastiꞌ,
ne canábacaꞌ naa gudxiguetaꞌ laaca ni qué huabanaꞌ.
5 Diuxi ni bizáꞌ naa, lii nannuꞌ pabiáꞌ nahuati xpiaaneꞌ;
qué zanda diꞌ gucaacheꞌ ca donda xtinneꞌ neza luluꞌ.
6 Tata Diuxi, Diuxi ni jma nandxóꞌ,
¡biiyaꞌ qué gusutuéꞌ lú
ca ni rucaa ruaa lii!
Diuxi xtiꞌ Israel,
¡cadi guni naa gudxiidechecabe lii,
ca binni cuyubi lii ca!
7 Runi lii ruayaꞌ guiráꞌ ca diidxaꞌ guidxa ni rábicabe naa;
ne nabé rusutuícabe luáꞌ;
8 ¡nacaꞌ casi ti binni guidxi zitu
ne tuuxa qué runibiáꞌ ca biꞌchiꞌ laa!
9 Cadxiicheꞌ runi lídxiluꞌ;
luguiaꞌyaꞌ biaba guiráꞌ ca diidxaꞌ guidxa
xtiꞌ ca ni caguu dí lii.
10 Ora ruunaꞌ ne qué gahuaꞌ la?
ruxídxicabe naa;
11 pa gacuáꞌ lari yaaseꞌ,
maca cuxídxicabe naa.
12 Guiráꞌ tu cuchagaruaa naa,
ne ca binnigüeꞌ riguixhecaꞌ saa xtinneꞌ.
13 Naa la? Tata Diuxi, lii nga rucaa ridxi.
Diuxi ni bizáꞌ naa, ¡gucané naa yanna!
Runi guendaranaxhii xtiluꞌ, ¡bicabi naa!
Cadi gusaanuꞌ de gacaneluꞌ naa, ¡bilá naa!
14 ¡Gupa naa tí cadi guiaazeꞌ ndaaniꞌ beñe!
¡Bilá naa lu náꞌ ca ni nanalaꞌdxiꞌ naa,
ne gulee naa ndaaniꞌ nisa ziaꞌ riꞌ!
15 ¡Cadi gusaanuꞌ xhubiyú stipa nisa diꞌ naa!
¡Cadi gusaanuꞌ gabi bidunu nisa diꞌ naa
ne chineni naa!
16 Tata Diuxi, bicabi naa;
¡lii nacháꞌhuiluꞌ ne lii nga guendaranaxhii!
Biiyaꞌ naa, bilaselaꞌdxiꞌ naa;
17 ¡cadi gudxiidecheluꞌ xpínniluꞌ diꞌ!
¡Bicabi ca naa, nuaa ra naxoo!
18 Bidxiña ra nuaaꞌ, ne bilá naa;
¡bilá naa lu náꞌ ca ni nanalaꞌdxiꞌ naa!
19 Lii runibiouꞌ guiráꞌ ca diidxaꞌ guidxa,
ne guiráꞌ ca xtuí huadideꞌ;
lii maꞌ nannuꞌ tuu nga ca ni nanalaꞌdxiꞌ naa.
20 Ca diidxaꞌ guidxa ca maꞌ gundaacaꞌ ladxiduáꞌ;
¡naguunduꞌ nuaaꞌ qué gapaꞌ stipa!
Biyubeꞌ siáꞌ tu laa
guiáꞌ ne guilaselaꞌdxiꞌ naa.
21 Lu guendaró xtinneꞌ la? bisábacabe xiixa ni ruuti,
ne dxi guteꞌ nisa la? biguéꞌcabe naa nisa naíꞌ.
22 ¡Xmexacabe ne guendaró rutaagulisaa laacabe la?
gusábani laacabe!
23 ¡Bisicheepaꞌ lúcabe
ne biniditi ñeecabe!
24 Bisaba dí xtiluꞌ luguiácabe;
¡ne binidé laacabe ne xiana xtiluꞌ!
25 Bisidachi lídxicabe,
ne guirutiꞌ cueza ndaanicani;
26 tí rizabinandacabe ni guluuluꞌ xizaa
ne ruxídxicabe xiuubaꞌ ni bininaluꞌ.
27 Biquixe laacabe ni runicabe;
¡ne cadi guilaseláꞌdxiluꞌ laacabe!
28 ¡Bixhá lácabe lu guiꞌchiꞌ xtiꞌ guendanabani!
¡Ne cadi cuꞌluꞌ laacabe lade binni ni runi jneza!
29 Huaxa naa la? huaraꞌyaꞌ ne nuaaꞌ xizaa,
gundisa naa, Diuxi ni bizáꞌ naa, ne bilá naa.
30 Zuundaꞌ saa nayecheꞌ ra guiete lá Diuxi;
ne stale guendanayecheꞌ ne ladxiduáꞌ nga guneꞌ ni,
31 ne zacá jma ziecheꞌ Tata Diuxi
que ñuuteꞌ ti yuze neza lube
o ti yuze huiiniꞌ ni maꞌ napa cachu ne cascu.
32 Ra guꞌyaꞌ ca ni nuu xizaa la? ziéchecaꞌ
ne laca zusiecheꞌ ladxidóꞌ ca ni ruyubi Diuxi;
33 ti Tata Diuxi rucaadiaga ca binni nazíꞌ
ne qué rudxii déchebe ca xpínnibe ni daguyoo.
34 ¡Lagusisaca Tata Diuxi laatu, guibáꞌ, guidxilayú, nisadóꞌ
ne guiráꞌ ni nabani nuu ndaanicani!
35-36 Diuxi zulá Sión,
ne zabiguetaꞌ zandísabe ca guidxi xtiꞌ Judá.
Ca xiiñiꞌ ca xpínnibe zaca xticaꞌ guidxi diꞌ,
zabezacaꞌ racá ne zaca xticaꞌ ni;
¡ca ni nadxii laabe la? zabánicaꞌ ndaanini!