Saa ra bireendu Israel
Ni gudixhe xaique xtiꞌ ca binni ruundaꞌ, ra xhidxi ca yagalé. Guendaruundaꞌ diidxaguieꞌ ne diidxariuundaꞌ rusisacanécabe Diuxi ni bicaa David.
68
Ora riasa Diuxi la?rireeche ndase ca ni nanalaꞌdxiꞌ laabe;
ca ni qué racalaꞌdxiꞌ laabe la? ruxooñelucaꞌ;
2 riniticaꞌ casi guꞌxhuꞌ lu bi,
riacaꞌ casi guiꞌriꞌ lu bele;
¡gastiꞌ nga naca ca ni qué guiquiiñeꞌ neza lú Diuxi!
3 Huaxa ca ni nachaꞌhuiꞌ la? riéchecaꞌ;
neza lú Diuxi la? riecheꞌ ladxidoꞌcaꞌ,
¡richésacaꞌ ne guendanayecheꞌ ca!
4 Laatu laguundané Diuxi,
laguundané laabe saa ra riete lábe;
lagusisaca dxa ni dxiꞌbaꞌ deche maniꞌ canaguxooñeꞌ lade za.
¡Laguiechené Tata Diuxi!
¡Ne laguiecheꞌ neza lube!
5 Diuxi, ni nabeza ndaaniꞌ yuꞌduꞌ ndaayaꞌ xtiꞌ,
laa nga bixhooze ca bizabi,
ne laa rulá gunaa ni maꞌ guti xheelaꞌ;
6 ca ni nuu stubi la? Diuxi rudii laacaꞌ ra cuézacaꞌ,
rundaabe ca ni zeguyoo ne rutálebe xticaꞌ;
ca ni rucaalú laabe la? zabézacaꞌ lu ti layú bidxi.
7 Ay Diuxi, dxi guzá níruluꞌ lu ca xpínniluꞌ
guzaneluꞌ laacabe lu ti layú dachi,
8 biniibi dxacha guidxilayú,
biaba nisaguié de guibáꞌ,
gucaditi dani Sinaí neza lú Diuxi,
neza lú Diuxi xtiꞌ Israel.
9 Ay Diuxi, bisabadxachaluꞌ nisaguié;
ca xpínniluꞌ maꞌ bidxaga, lii bidiiluꞌ stipa laacabe.
10 Ne raqué guleza ca xpínniluꞌ,
ne lii, ay Diuxi, runi guendanachaꞌhuiꞌ xtiluꞌ,
bidiiluꞌ binni nazíꞌ ni guiquiiñe.
11 Diidxaꞌ ni guníꞌ Tata Diuxi la?
stale gunaa bizaabini lu guidxi:
12 «¡Cuxooñeꞌ, cuxooñelú ca xaique ne ca dxuꞌ xtiꞌ!»
Ne ca ni biaaxhacabe que la?
ca gunaa que gudiizicani lucaꞌ, ndaaniꞌ lídxicaꞌ,
13 peru laatu biaanatu lade ca dendxuꞌ qué nitíndetu.
¡Zacatu ti xhiaa guugu stiá napa duubiꞌ casi plata!
¡Ne duubiꞌ xtime naze oro chaꞌhuiꞌ!
14 Dxi guladxi Diuxi ni nandxóꞌ ca xaique que,
cayaba ti nanda roꞌ ndaaniꞌ guiꞌxhiꞌ Salmón.
15 ¡Biaa nga pabiáꞌ nasoo ca guiꞌxhiꞌ xtiꞌ Basán,
ne pabiáꞌ nga nasoo ca dani xtini!
16 Laatu, dani soocaꞌ,
xiñee ruuyatuxhutu dani ni gulí Diuxi para cueza.
¡Tata Diuxi zabeza racá dxi ne gueelaꞌ!
17 Neza gayuaa nga rugabaꞌ Diuxi ca piquiiliguí xtiꞌ;
ne dede Sinaí nga dxíꞌbabe ndaanicani yendabe ndaaniꞌ xhiúꞌdube.
18 Ay Diuxi, dede ra jma nasoo gudxibaneluꞌ ca ni bigaa lade ra cadíndecabe;
ne bidiicabe lii xindxaa lade binni
dede ca ni biasa luguialuꞌ biabaxíbicaꞌ neza luluꞌ, Tata Diuxi.
19 ¡Nandaayaꞌ gacaꞌ Tata Diuxi, Diuxi ni bizáꞌ ne ni bilá laanu,
ti dxi ne dxi nuabe ni ñuanu!
20 Diuxi xtinu nga ti Diuxi ni rulá
ne zanda gulá laanu lu náꞌ guendaguti.
21 Zandaa Diuxi ique ca ni nanalaꞌdxiꞌ laa,
ique ca ni cuchee ruꞌ.
22 Tata Diuxi maꞌ guníꞌ:
«Zabeeꞌ lii de Basán;
ne zabee lii de ndaaniꞌ nisadóꞌ ni jma gueteꞌ,
23 tí ugadxeluꞌ ñeeluꞌ lu nisa rini
xtiꞌ ca ni nanalaꞌdxiꞌ lii,
ne gueꞌ ca xpíꞌculuꞌ rini xtícabe.»
24 Ay Diuxi, Diuxi ne Xaique roꞌ xtinneꞌ,
ndaaniꞌ yuꞌduꞌ roꞌ xtiluꞌ rihuini ludoo binni ziyuu
cayechenecaꞌ lii.
25 Zaniru ca ni ziyuundaꞌ
dechecabe nanda ni cuxhidxi saa,
ne galahuiꞌ zeeda binnidxaapaꞌ huiiniꞌ
cagapa pandero.
26 ¡Guiráꞌ xixetu lacuu ndaayaꞌ Diuxi, Tata Diuxi!
¡Guidubi Israel lacuu ndaayaꞌ laabe!
27 Zaniru Benjamín xhuncu lúcabe,
laa ne stale xaique xtiꞌ Judá,
xtiꞌ Zabulón ne Neftalí.
28 Diuxi ni bizáꞌ laadu, biluíꞌ laadu stipa roꞌ xtiluꞌ;
¡gudixhe chaahuiꞌ guiráꞌ ni biꞌnuꞌ runi laadu!
29 Dede yuꞌduꞌ soo xtiuꞌ, ni nuu Jerusalén,
ra ridxiña ca xaique roꞌ maꞌ neca ni gusigadeꞌcaꞌ lii,
30 bilidxi Egipto, ni naca ti maniꞌ nabeza lade guixi donda,
ni zeedayaca casi ti neza yuze duxhuꞌ ne yuze huiiniꞌ
ra cuyúbicaꞌ gápacaꞌ bidxichi la? ruxhateñeecaꞌ ca guidxi;
¡rucheeche ndasecaꞌ ca binni nadxii guendaridinde!
31 Zeeda jma xaique de Egipto;
ne Etiopía zundapináꞌ guibáꞌ ra nuu Diuxi.
32 ¡Laguundané Diuxi, xaique xtiꞌ guidxilayucaꞌ,
laguundaꞌ saa ra guiete lábe,
33 dxa ni dxiꞌbaꞌ deche maniꞌ ni ruxooñené laame guibáꞌ,
ca guibáꞌ ni qué zanitilú!
Lagunadiaga xtídxibe,
ti ridxi nadipaꞌ.
34 Laganna pabiáꞌ nga nandxóꞌ Diuxi:
tí guendarisaca xtibe ruseeguni Israel,
ne guendanandxóꞌ xtibe rugaandani guibáꞌ nasiá.
35 Nandxóꞌ nga Diuxi ndaaniꞌ yuꞌduꞌ xtiꞌ;
Diuxi xtiꞌ Israel rusisaca ne rudii stipa ca xpinni.
¡Nandaayaꞌ gacaꞌ Diuxi!