Nabé nga sicarú guiráꞌ ni ruꞌnuꞌ
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ, diidxariuundaꞌ rusisacanécabe Diuxi.
66
Laguundaꞌ neza lú Diuxi ne guendanayecheꞌ,binni guidxilayucaꞌ;
2 laguundaꞌ saa ra gusisácatu lá nandxóꞌ xtibe;
laguundaꞌ saa sicarú gúnabe.
3 Lagabi Diuxi:
«Nabé nga sicarú guiráꞌ ni ruꞌnuꞌ.
Ne stipa xtiluꞌ ca la?
ca binni nanalaꞌdxiꞌ lii dede ziábacaꞌ xañeeluꞌ;
4 guiráꞌ xixé binni nadxii lii,
ngue runi ruundacabe saa xtiuꞌ.»
5 Lataꞌ, lataguuyaꞌ guiráꞌ dxiiñaꞌ xtiꞌ Diuxi,
guiráꞌ guendaridxagayaa ni huayúnibe runi binni;
6 bíꞌnibe nisadóꞌ ca ti layú bidxi,
ne zacá gunda gudiꞌdiꞌ ca bixhozególanu ndaaniꞌ guiigu;
¡guiéchenu lu xtiidxaꞌ Diuxi!
7 Ne stipa xtibe, dxi gueelaꞌ laabe nga xaique;
rundaachibe ca guidxi roꞌ,
tí guiráꞌ ca ni rucaalú laabe
cadi guiásacaꞌ luguiabe.
8 ¡Guidxiroꞌcaꞌ, lacuu ndaayaꞌ Diuxi xtinu!,
¡laguxhidxi saa ra gusisácanu laabe!
9 Tí huadiibe laanu guendanabani;
ne qué huazaanabe laanu guiábanu.
10 Diuxi ni bizáꞌ laadu, guluubiaꞌluꞌ laadu ne huachíñalu laadu ra nagana,
¡huasialuꞌ laadu casi riaꞌriꞌ guiibaꞌ quichiꞌ!
11 Bisaꞌbuꞌ laadu ndaaniꞌ ti guixhe guuzeꞌ;
biguaꞌluꞌ laadu ni nanaa.
12 Bisaanuꞌ bixhatañee tutiisi laadu;
gudididu ndaaniꞌ nisa ne lade bele,
deruꞌ bisaanuꞌ laadu gucuaadu bi.
13 Ziuaaꞌ ndaaniꞌ yuꞌduꞌ xtiuꞌ ne zuuteꞌ dendxuꞌ guisigaꞌdeꞌ lii;
zacatiꞌ zanda quixeꞌ ni bidieeꞌ xtiidxaꞌ lii,
14 dxa diidxaꞌ ni bicabeꞌ lii
dxi nuaaꞌ lu ti guendanaxoo.
15 Zaguixheꞌ neza luluꞌ maniꞌ naróꞌ casi xindxaa ndaayaꞌ;
zuuteꞌ neza luluꞌ yuze ne chivu,
ne laaca zuuteꞌ dendxuꞌ.
16 ¡Lataꞌ guiráꞌ xixetu,
laatu ca ni ridxibi Diuxi!
¡Lagucaadiaga, chigüeniáꞌ laatu
ni huayúnibe runi naa!
17 Ne ruaa ne ludxeꞌ
bicaaridxeꞌ ne bisisaca laabe.
18 Pa ñaca nahuati xquendabiaaneꞌ la?
qué lica nucaadiaga Tata Diuxi naa;
19 ¡huaxa bicaadiagabe naa,
ne bizaaláꞌdxibe ca diidxaꞌ ndaayaꞌ xtinneꞌ!
20 ¡Nandaayaꞌ nga Diuxi,
qué nudxiibe ca diidxaꞌ ndaayaꞌ xtinneꞌ,
ne qué nuzaanabe de ganaxhiibe naa!