Diuxi nga naquiiñeꞌ guisaca
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ, diidxariuundaꞌ rusisacanécabe Diuxi.
65
Ay Diuxi xtiꞌ Sión,¡lii nga naquiiñeꞌ gusisácadu!,
¡ne naquiiñeꞌ gúnicabe ni maꞌ bidii xtiidxacabe lii,
2 tí rucaadiagaluꞌ diidxaꞌ ndaayaꞌ!
Guiráꞌ xixé binni reeda ra nuuluꞌ.
3 Guiráꞌ guendanadxabaꞌ xtidu nabé rucaani laadu yaga,
huaxa lii ruxhaluꞌ ca donda xtidu.
4 Aque nayecheꞌ nga binni ni ribiuꞌ
ne ribiꞌneuꞌ laa cueꞌluꞌ,
ndaaniꞌ yuꞌduꞌ xtiuꞌ.
¡Dede zadxá tipa peꞌ ladxidoꞌdo de ca ni jma sicarú ni nuu ndaaniꞌ liꞌdxuꞌ,
ne guendanandxóꞌ xtiꞌ yuꞌduꞌ xtiluꞌ!
5 Diuxi ni rulá laadu,
lii rucábiluꞌ laadu
ne guiráꞌ dxiiñaꞌ ni ruꞌnuꞌ jneza ne nayá;
guidubi guidxilayú ricá lú lii,
zaqueca nisadóꞌ ni nuu zitu;
6 ne stipa roꞌ xtiluꞌ,
ruzuhuaa dxiichiluꞌ ca dani.
7 Lii rucueezuꞌ xtidxi nisadóꞌ
ne guendaraca yaya xtiꞌ ca guidxi;
8 dede ca ni nabeza guidxi zitu
racaditi ora gúꞌyacaꞌ guendanandxóꞌ xtiuꞌ;
runi lii ricá ridxi nayecheꞌ
neza rindani ne neza riaaziꞌ gubidxa.
9 Lii rápaluꞌ layú;
rusabaluꞌ nisaguié ne rúniluꞌ ni nagáꞌ;
ne ca guiiguꞌ roꞌ,
rusiniisiluꞌ guela.
¡Zacá ruꞌnuꞌ dxiiñaꞌ layú!
10 Lii ruguuluꞌ gudxa lu ca surcu,
rusiáyaluꞌ ca tarrón xtini;
rucuudxiluꞌ layú ne stale nisaguié,
ne ruguuluꞌ ndaayaꞌ ca cuaananaxhi xtini.
11 Lii ruchá típaluꞌ iza ca ne ndaayaꞌ,
ca za xtiuꞌ rucheeche guendanabani;
12 ca guixi xtiꞌ ca yu bidxi ca riguibaxigaacaꞌ
ne sicarú rihuini ca guiꞌxhiꞌ nagáꞌ;
13 naze dendxuꞌ lu ca layú paampa,
ndaaniꞌ ñaa sicarú nuu guela;
¡guiráꞌ si tu ruundaꞌ ne rucaa ridxi nayecheꞌ!