Diidxaꞌ ni rinabanécabe Diuxi gapaꞌ laacabe
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David.
64
Diuxi ni bizáꞌ naa, bicaadiaga guendaruguu liibi xtinneꞌ;bilá naa lu náꞌ ca ni nanalaꞌdxiꞌ naa.
2 Gupa naa de lu náꞌ ca ni nadxabaꞌ,
ne bilá naa lu guiráꞌ ni cá íquecabe gúnicabe naa;
ne gulee naa lu xneza ca ni nadxabaꞌ,
3 rutúxhucabe lúdxicabe casi ñácani ti gudxíu,
ne rulaacabe diidxaduxhuꞌ luguiaꞌyaꞌ casi ñácani ti bazandíꞌ.
4 Dede ra nucaachilúcabe rucuaagucabe binni qué guzaabiꞌ;
mala si rucuaagucabe ne qué ridxíbidicabe.
5 Rusiecheꞌ saacabe laacabe ti gúnicabe ni nadxabaꞌ;
riníꞌ íquecabe cuaquicabe ti xaléꞌ ni nagaꞌchiꞌ,
ruzuluxacabe guirutiꞌ zuuyaꞌ laacabe,
6 ne guirutiꞌ zanna guiráꞌ guendanadxabaꞌ xtícabe.
Gannasicabe nuu tobi ni nanna
guiráꞌ ni cá ique binni,
laa zadxela guirani.
7 Diuxi zudu laacabe ne bazandíꞌ xtiꞌ,
nin qué zánnacabe zuniná laacabe;
8 laaca ruaacabe guuti laacabe,
ne ca ni guꞌyaꞌ la? zuxidxi laacabe.
9 Ne raqué ruꞌ zusisácacabe Diuxi,
ne zaníꞌcabe guiráꞌ ni bíꞌnibe;
ne ziénecabe guiráꞌ dxiiñaꞌ ni huayúnibe.
10 Binni nachaꞌhuiꞌ la? ziechené Tata Diuxi,
ne zuyubi gulabe laa,
ne guiráꞌ binni nayá xquendanabaniꞌ
zadxá tipa ladxidoꞌcaꞌ.