Diuxi nga ruchá ladxidóꞌ binni
Guendaruundaꞌ diidxaguieꞌ bicaa David, dxi guyuu lu layú dachi xtiꞌ Judá.
63
¡Diuxi ni bizáꞌ naa, lii nga Diuxi xtinneꞌ!Ne guidubinaca ladxiduáꞌ nga ruyubeꞌ lii, casi tobi ni cayati nisa;
ne guidubinaca ladxiduáꞌ ribanaꞌ lii,
casi ti layú bidxi qué gapa nisa.
2 ¡Racaladxeꞌ guuyaꞌ lii ndaaniꞌ yuꞌduꞌ xtiluꞌ,
guuyaꞌ guendanandxóꞌ ne guendarisaca xtiluꞌ,
3 tí guendaranaxhii xtiluꞌ risácani jma que guendanabani!
Zusisaca lii ne ruaaꞌ;
4 guidubi xquendanabaneꞌ zaguaaꞌ ndaayaꞌ lii,
ne zundapenayáꞌ guibáꞌ zanieniáꞌ lii.
5 Zadxá tipa ladxiduáꞌ,
sica tobi ni zuba ruaa mexaꞌ cayó nanixe,
ne guendanayecheꞌ zusisaca ruaaꞌ lii.
6 Huaxhinni, ora maꞌ nexheꞌ,
rietenaladxeꞌ lii ne ricá iqueꞌ lii;
7 tí lii nga racaneuꞌ naa.
¡Nayecheꞌ nuaaꞌ xaꞌnaꞌ xhiaaluꞌ!
8 Guidubi guendanabani xtinneꞌ guiꞌdiꞌ ni lii,
ne náꞌ ndígaluꞌ qué rundaa naa.
9 Ca ni cuyubi guutiꞌ naa la?
ziábaca ndaaniꞌ baꞌ;
10 ¡záticabe ruaa gudxíu,
ne zo gueuꞌ laacabe!
11 Huaxa xaique roꞌ diꞌ ziechené Diuxi;
ca ni ricá ruaa laabe la? zuundacaꞌ saa yecheꞌ,
ne ca ni rusiguii la? zieeguꞌ ruaacaꞌ.