Diuxi si nga tobi lucha ni rapa
Ni gudixhe xaique xtiꞌ ca binni ruundaꞌ. Xtiꞌ Jedutún. Guendaruundaꞌ diidxaguieꞌ bicaa David.
62
Diuxi si nga riguixhedxí ladxiduáꞌ;laabe rulabe naa.
2 Laatibe nga rulabe ne rápabe naa.
Qué ziabadiáꞌ, laabe naazebe naa.
3 Tica padxí ndiꞌ natu gusaanatu de gucaalutu naa,
ne gacaláꞌdxitu gusábatu naa,
casi xa ñacaꞌ ti basoo ni cayaba ntaa
o casi xa ñacaꞌ ti leꞌ maꞌ yaca guiaba layú.
4 Nisi cá íquetu guutitu naa;
nabé naquiitu guendarusiguii.
Ruaatu ruguu ndaayaꞌ naa,
xisi la? riguudí naa lu xquendabiaanitu.
5 Diuxi si nga riguixhedxí ladxiduáꞌ;
laasibe nga ricá luáꞌ.
6 Laatibe nga rulabe ne rápabe naa.
Qué ziabadiáꞌ, laabe naazebe naa.
7 Lu náꞌ si Diuxi nga nuu guendarilá ne guendarisaca xtinneꞌ;
laabe nga rápabe naa ne ra nuube rucaacheluaꞌ.
8 ¡Binni xquídxecaꞌ, cadi guiaanadxitu de guicá ruaatu laabe!
¡Lagabi laabe ne diidxaꞌ ndaayaꞌ ni nuu ndaaniꞌ ladxidoꞌto!
¡Diuxi nga rapa laanu!
9 Binni zedagaca casi ti bacaandaꞌ,
casica ni napa zaqueca ni qué gapa;
pa ñuubiaꞌ guiropacaꞌ la?
gastiꞌ nga laaca.
10 Cadi guicá lutu lu guendanaxoo;
¡cadi gúnitu laatu nandxóꞌ ne guendaribaꞌnaꞌ!
Pa gueedagápatu bidxichi la?
cadi guicá lutu ni.
11-12 Maꞌ stale bieque nga binadiaꞌgaꞌ
diidxaꞌ guníꞌ Diuxi:
xtibe nga guendanandxóꞌ ne guendaranaxhii,
ne laabe zaguíxebe binni de guiráꞌ ni biꞌniꞌ.