Guendaricá lú gulá Diuxi laanu
Ni gudixhe xaique xtiꞌ ca binni ruundaꞌ, ra xhidxi ca yagalé. Ni bicaa David.
61
Diuxi ni bizáꞌ naa, bicaadiaga ca ridxi yuubaꞌ xtinneꞌ,¡bilabi naa canieniáꞌ lii!
2 Dede ra nariꞌniꞌ guidxilayú cucaaꞌ riꞌdxeꞌ lii,
ladxiduáꞌ nuu nabani yati.
Bilá naa, bidxiibaꞌ naa lu ti guie ni jma nasoo,
3 lii nga bacheezaꞌ xtinneꞌ.
¡Nácaluꞌ casi ti yoobiyéꞌ ni naguidxi
ni rulá naa lu náꞌ ca ni nanalaꞌdxiꞌ naa!
4 Racaladxeꞌ guibaneꞌ ndaaniꞌ yuꞌduꞌ xtiluꞌ guiráꞌ dxi,
ne gucacheluáꞌ xaꞌnaꞌ xhiaaluꞌ.
5 Lii, Diuxi ni bizáꞌ naa, maꞌ bicaadiagaluꞌ ni bidieeꞌ xtiidxaꞌ lii,
ne bisigáꞌdeluꞌ naa guiráꞌ ni rudiiluꞌ
ca ni rusisaca láluꞌ.
6 Bitalé xquendanabani xaique roꞌ;
guibánibe xadxí, stale stale peꞌ iza,
7 tí ganda gúnibe xhiiñabe ne ndaayaꞌ xtiluꞌ.
Gupa laabe ne guendaranaxhii ni dxandíꞌ xtiuꞌ;
8 zacá zusisacaꞌ láluꞌ dxi ne gueelaꞌ,
ne zacá zuneꞌ ni bidieeꞌ xtiidxaꞌ lii guiráꞌ dxi.