Diidxaꞌ ndaayaꞌ ni rinabanécabe Diuxi gacané laacabe
Ni gudixhe xaique xtiꞌ ca binni ruundaꞌ, sica rixidxi saa xtiꞌ «Los lirios del testimonio». Diidxaguieꞌ rusiidiꞌ ni bicaa David, dxi biree zidxelasaa ne ca arameo xtiꞌ Naharaim ne xtiꞌ Sobá, ne Joab, dxi bibiguetaꞌ, gudixhedxí doce mil dxuꞌ xtiꞌ Edom lu Layú Zidi nuu lade dani.
60
Runi xiana ni huadiꞌdu lii, ay Diuxi, maꞌ bisaanuꞌ laadu,maꞌ binideluꞌ laadu;
¡bidxiguetaꞌ stipa xtidu yanna!
2 Biniibidxachaluꞌ guidxilayú dede bixaleꞌ;
¡yanna la? biseeguꞌ ni ti cayá stubini!
3 Bitiidiluꞌ xquídxiluꞌ lu ti guendanagana,
ne bigueꞌluꞌ laadu nisadxuꞌniꞌ ni ruché ique binni.
4 Gudixhenaluꞌ ca binni ni ruzuubaꞌ xtiidxaluꞌ
ti guilácabe lade bazandíꞌ.
5 ¡Bicabi laadu ne bilá laadu ne stipa xtiluꞌ!
¡Bilá ca ni nadxiiluꞌ!
6 Ndaaniꞌ yuꞌduꞌ xtiꞌ Diuxi nga guníꞌ:
«¡Ne stale guendanayecheꞌ nga quiizeꞌ layú xtiꞌ Siquem,
ne zaqueca ca layú xtiꞌ guidxi Sucot!
7 Xtinneꞌ ca layú xtiꞌ Galaad ne Manasés;
layú xtiꞌ Efraín zedagaca ti bichuga ni rapa iqueꞌ;
ne layú xtiꞌ Judá naca yagabiáꞌa xtinneꞌ;
8 layú xtiꞌ Moab nga ninchaa ra riguiibeꞌ nayaꞌ;
lu layú xtiꞌ Edom zulaa xquelaguiꞌdeꞌ;
¡ne zuguayaꞌ ti ridxi nayecheꞌ tí gánnacabe gudixhedxiéꞌ ca filisteo!»
9 Tu laa chiné naa guidxi ni nuu lindaa ca yaꞌ;
tu zanda guluíꞌ naa neza xtiꞌ Edom.
10 Pa lii, Tata Diuxi, maꞌ bicaanouꞌ laadu yaꞌ;
¡maꞌ qué rineuꞌ ca dxuꞌ xtidu lade guí!
11 Gucané laadu ti quixhedxidu ca ni nanalaꞌdxiꞌ laadu ca,
tí gastiꞌ nga naca stipa xtiꞌ binni.
12 Ne stipa xtiꞌ Diuxi zanda gúnidu stale guendaridxagayaa;
¡laabe nga guxhatañeebe ca ni nanalaꞌdxiꞌ laadu!