Tata Diuxi nga ni rulá laanu
Ni gudixhe xaique xtiꞌ ca binni ruundaꞌ. «No destruyas». Diidxaguieꞌ bicaa David, dxi Saúl bidii diidxaꞌ gundaachicabe lidxi David ne guuticabe laa.
59
Diuxi ni bizáꞌ naa, gulee naa lu náꞌ ca ni nanalaꞌdxiꞌ naa;ne bilá naa lu náꞌ ca ni racalaꞌdxiꞌ guniná naa.
2 Gulee naa lu náꞌ ca ni qué guiquiiñeꞌ,
bilá naa lu náꞌ ca ni ruuti binni,
3 ti nuu binni nandxóꞌ
cabezasicaꞌ guuticaꞌ naa.
Tata Diuxi, qué huayuu dxi gucheeniáꞌ lii;
4 qué huayuu dxi guneꞌ xiixa ni nadxabaꞌ,
nin ne zacá, nuucabe gucaalúcabe naa.
¡Bibani! ¡Bidxaagalú naa ne biiyaꞌ!
5 Lii, Tata Diuxi, Diuxi ni nandxóꞌ, Diuxi xtiꞌ Israel,
bibani ne bisabanáꞌ ca binni qué ruzuubaꞌ xtiidxaluꞌ;
cadi guiadiouꞌ ca ni nadxabaꞌ ca,
cadi huandíꞌ diꞌ nayá ladxidóꞌcabe.
6 Ribiguetacabe huaxhinni, riduxhucabe casi biꞌcuꞌ,
ne riguucabe leꞌ guidxi.
7 Dede riree bichiiñaꞌ ruaacabe,
riníꞌcabe ti diidxaꞌ naná:
«¡Guirutiꞌ zunadiaga laadu!»
8 Lii Tata Diuxi, ruxidxuꞌ laacabe;
rugaanduꞌ laacabe.
9 Ndaaniꞌ náluꞌ nuaaꞌ dxiicheꞌ, Diuxi ni bizáꞌ naa,
lii nga yoo ni rulá ne rapa naa.
10 Diuxi ni nadxii naa la? zuchaagalú naa;
ne zuluíꞌ naa ra guidiiñeyú ca ni nanalaꞌdxiꞌ naa.
11 Cadi guiadiouꞌ laacabe,
tí ganna dxichi ca binni xquidxeꞌ ni;
bisiaya laacabe ne stipa xtiuꞌ ne bisaba laacabe.
¡Tata Diuxi nga ni rulá laanu!
12 Rucheecabe ne guiráꞌ ni riníꞌcabe;
¡Pué guiananécabe guendanayáꞌ xtícabe
ne xquendarusiguiicabe!
13 ¡Binduuxeꞌ laacabe, binduuxeꞌ laacabe ne xiana xtiuꞌ!
¡Cadi guibánicabe!
¡Gánnacabe Diuxi nga Xaique xtiꞌ Jacob
ne de ra riluxe guidxilayú!
14-15 Ora guibiguetacabe lu gueelaꞌ zeedaduxhucabe casi biꞌcuꞌ,
ne sácabe ndaaniꞌ guidxi guyúbicabe ni gócabe,
zuunacabe purtiꞌ qué zadxá diꞌcabe.
16 Naa la? zuundaꞌ casi peꞌ guirá gueelaꞌ;
zuchayaꞌ bi yanneꞌ zaniéꞌ xtiidxaꞌ xquendaranaxhiiluꞌ ne xquendanandxoꞌloꞌ.
Tí lii nga hualaluꞌ naa,
lii nga yoo ra ruyubeꞌ ora nuaaꞌ xizaa.
17 Diuxi ni bizáꞌ naa, zuundaꞌ saa nayecheꞌ xtiluꞌ,
tí lii nga stipa xtinneꞌ ni rulá naa;
¡lii nga Diuxi ni nadxii naa!