Ra canábacabe gaca ni jneza
Ni gudixhe xaique xtiꞌ ca binni ruundaꞌ. «No destruyas». Diidxaguieꞌ bicaa David.
 
58
Laatu, ca ni nandxóꞌ,
huandíꞌ nga rúnitu ti dxiiñaꞌ nayá
ora cuguubiaꞌtu xtonda binni la?
2 O lagala, rúnitu ti dxiiñaꞌ nayuudxuꞌ;
rutindesitu binni ndaaniꞌ guidxi.
 
3 Ca binni nadxabaꞌ la? dede nuucaꞌ ndaaniꞌ jñaacaꞌ maca qué guiquiiñeꞌcaꞌ;
ca ni rusiguii caꞌruꞌ lica gálecaꞌ maꞌ bireechucaꞌ.
4 Naduxhucaꞌ casi beendaꞌ;
nácacaꞌ casi ti beendaꞌ duxhuꞌ
ni runi laa diagacuaataꞌ, nutaagudiaga
5 tí cadi guna saa xtiꞌ xpixuaanaꞌ,
ti binni ni rusidóꞌ beendaꞌ duxhuꞌ.
 
6 Diuxi ni bizáꞌ naa, ¡gundaa láyacabe!
Tata Diuxi, ¡gundaa laya beedxeꞌ xtiꞌ ca maniꞌ duxhuꞌ ca!
7 Guinitilúcabe, casi ribidxi nisa lu layú;
guibídxicabe, casi ribidxi guixiyaa lu neza;
8 guiácabe, casi riá bichuꞌ lu nisaroonde xtiꞌ,
¡tídicabe casi rutiidiꞌ xiiñicabe ti baꞌduꞌ ni qué ñuuyaꞌ xpiaaniꞌ guidxilayú!,
9 sin gánnacabe gazebelecabe casi guichi;
guiaaxhacabe ne xiana, casi riaaxha guixiyaa.
 
10 Ca ni gucuaa xtiidxaꞌ Diuxi la? ziéchecaꞌ ora gúꞌyacaꞌ guiabanáꞌ binni nadxabaꞌ;
¡zugadxecaꞌ ñeecaꞌ ndaaniꞌ rini xtícabe!
11 Ne ora que zuzeeteꞌ binni:
«¡Huandíꞌ nga risaca guzuubaluꞌ xtiidxaꞌ Diuxi!
¡Nuu ti Diuxi ni caguubiaꞌ guidxilayú!»