Ra canábacabe Diuxi gulá laacabe
Ni gudixhe xaique xtiꞌ ca binni ruundaꞌ. «No destruyas». Diidxaguieꞌ bicaa David dxi bixooñelú de Saúl ne yeucaachilube ndaaniꞌ ti cueva.
57
Diuxi xtinneꞌ bilaselaꞌdxiꞌ naa, bilaselaꞌdxiꞌ naa Diuxi ni bizáꞌ naa,tí lii nga rabeꞌ gulaluꞌ naa.
Racaladxeꞌ gucacheluáꞌ xaꞌnaꞌ xhiaaluꞌ
laga tidi ca guendanaxoo riꞌ.
2 Chi gucaaꞌ ruaaꞌ Diuxi ni nandxóꞌ,
Diuxi ni racané naa lu guiráꞌ xixé.
3 De guibáꞌ zuseendabe xquendaranaxhiibe ne xtiidxaꞌ huandibe,
ne zulabe naa lu náꞌ ca ni ladxi naa ne xiana.
4 Maꞌ nexheꞌ layú,
lade beedxeꞌ ni ruxuuxe binni;
ca láyame, nácacani casi ti yagaguí ne bazandíꞌ,
lúdxime nga ti guiibaꞌ duxhuꞌ.
5 Diuxi ni bizáꞌ naa, lii nuulu guibáꞌ ra jma nasoo.
¡Ne guendanandxóꞌ xtiluꞌ ruchá guidxilayú!
6 Ca ni nanalaꞌdxiꞌ naa gudixhecaꞌ naa ti xaléꞌ
ti quiñentaacabe ladxiduáꞌ;
gundaacaꞌ ti guiruyú lu xnezaꞌ,
laaca laaca biabacaꞌ ndaanini.
7 Ladxiduáꞌ nuu ne lii, Diuxi ni bizáꞌ naa,
ladxiduáꞌ nuu gúꞌndane lii saa.
8 Bibani, ladxiduáꞌ;
laguibani, arpa ne salteriu;
¡tí gucuaaneꞌ telayú diꞌ!
9 Zuundaꞌ saa ra gusisacaꞌ lii, Tata Diuxi,
ndaaniꞌ ca guidxi huiiniꞌ ne ca guidxi roꞌ.
10 Guendaranaxhii xtiluꞌ naroꞌbaꞌ ni rugaandani guibáꞌ;
guendahuandíꞌ xtiluꞌ rugaandani guibáꞌ nasiáa.
11 Diuxi ni bizáꞌ naa, lii nuuluꞌ guibáꞌ ra jma nasoo.
¡Ne guendanandxóꞌ xtiluꞌ ruchá guidxilayú!