Diuxi, bilaselaꞌdxiꞌ naa
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David, ra gudindené profeta Natán laabe ra guyuunebe Betsabé naca xheela stobi.
51
Ay Diuxi, runi guendaranaxhii xtiuꞌ biáꞌ naa;ne guendanachaꞌhuiꞌ xtiuꞌ bixhá ca xtondaꞌ.
2 ¡Gudiibiꞌ guiráꞌ guendanadxabaꞌ xtinneꞌ!
¡Ne bisiá ca xtondaꞌ!
3 Nannadxiꞌcheꞌ piaꞌ maꞌ bicheeꞌ;
ne guiráꞌ ca donda xtinneꞌ cadi lica caxácani lu xquendabiaaneꞌ.
4 Ne lii, ne lii siouꞌ maꞌ bicheeniáꞌ,
bineꞌ ni nadxabaꞌ, ni peꞌ qué racalaꞌdxuꞌ gacaꞌ.
Ngue runi guendarusabanáꞌ xtiuꞌ jneza ni;
ne qué gápani ra guidiñeyuni.
5 Dxandíꞌ, qué iquiiñediáꞌ dede dxi guleꞌ;
maca nuayáꞌ donda dede dxi nuaaꞌ ndaaniꞌ jñaaꞌ.
6 Dxandíꞌ, lii nadxiiluꞌ ca binni ni nayá ladxidóꞌ,
ne bisiaaniluꞌ xpiaaneꞌ tí ganda guundaꞌ ni nagaꞌchiꞌ.
7 Ne yaga hisopoa biruba nisa xtiuꞌ luguiaꞌyaꞌ, tí guiá ladxiduáꞌ;
bigaze naa, tí guiaanaꞌ be be guiꞌchiꞌ.
8 Bichá stale guendanayecheꞌ ladxiduáꞌ;
bisiecheꞌ naa sti bieque, neca maꞌ bininaluꞌ naa.
9 Cadi gúꞌyadxiuꞌ ca donda xtinneꞌ,
ne bixhá ca guendanadxabaꞌ ni bineꞌ.
10 Ay Diuxi, ¡dané naa ti ladxidóꞌ nayá!,
¡dané naa xhieꞌdoꞌb nacubi ne huandíꞌ!
11 Cadi cuee chuluꞌ naa cueꞌluꞌ,
ne cadi gaxhuꞌ xhieꞌdoꞌ ndaayaꞌ xtiuꞌ naa.
12 Bisiecheꞌ naa sti bieque ne guendarulá xtiuꞌ;
ne gunaazeꞌ dxiichiꞌ naa ne xhieꞌdoꞌ nachaꞌhuiꞌ xtiuꞌ,
13 tí ganda guluéꞌ ca binni qué guiquiiñeꞌ ca neza xtiluꞌ
ne ca binni maꞌ bichee ca guibiguetacaꞌ ra nuuluꞌ.
14 Ay Diuxi, Diuxi ni rulá naa,
biiyaꞌ qué chi guuteꞌ binni,
tí ra guundaꞌ saa la? zaniéꞌ ruꞌnuꞌ jneza.
15 Bixhaleꞌ ruaaꞌ, Tata Diuxi,
tí ganda guundaꞌ saa sicarú ni gusiecheꞌ lii.
16 Lii qué racaláꞌdxiluꞌ xindxaa ne ninca guuticabe maniꞌ neza luluꞌ;
naa nudieeꞌ cani lii,
peru cadi nga diꞌ nga ni riuulaꞌdxuꞌ.
17 Ca xindxaa ni rudiicabe Diuxi nácacani ti xhieꞌdoꞌ yuubaꞌ;
¡huaxa lii, Diuxi, qué rudxiguetuꞌ ti ladxidóꞌ cayacadé!
18 Guca nachaꞌhuiꞌ ne Sión, ne guidubi ladxidoꞌloꞌ;
gundisaꞌ ca lindaa xtiꞌ Jerusalén sti bieque.
19 Ne ora que ruꞌ zuziguendaneluꞌ ni gudiicabe lii,
zacoouꞌ ca xindxaa que ne ca maniꞌ guuticabe neza luluꞌ;
ora que ruꞌ zaguíxhecabe yuze lu mexaꞌ ndaayaꞌ xtiuꞌ.