Diuxi nga ti xaique ni runi jneza
Guendaruundaꞌ diidxaguieꞌ ni bicaa Asaf.
50
Tata Diuxi, Diuxi xtiꞌ guiráꞌ xixé bidóꞌ, maꞌ guníꞌ;maꞌ gurídxibe guiráꞌ ni nabeza ndaaniꞌ guidxilayú riꞌ
dede neza rindani gubidxa la? ne neza riaaziꞌ.
2 Diuxi ruzaaniꞌ dede ndaaniꞌ Sión,
guidxi sicarú ni qué gapa ra guidiiñeyú.
3 Maꞌ zeeda Diuxi xtinu ne cadi zeeda dxibe;
lube zá niru ti bele ni runduuxeꞌ;
ne zeedabe lade ti bi nadipaꞌ.
4 Dede ra jma nasoo, Diuxi ribidxi guibáꞌ ne guidxilayú
ti gúꞌyacaꞌ chi gulídxibe ca xpínnibe:
5 «Laguchiña guiráꞌ ca ni qué huacheené naa,
ca ni bidii xtiidxaꞌ ne xindxaa ndaayaꞌa
gácacaꞌ tobi si ne naa.»
6 Ne guibáꞌ nga riníꞌ Diuxi nga xaique ni runi jneza.
7 «Bicaadiaga naa Israel, Guidxi xtinneꞌ;
chi gusiayaꞌ xtiidxaꞌ ne lii.
¡Naa nga Diuxi! ¡Diuxi xtiluꞌ!
8 Cadi caguiñeyuáꞌ diaꞌ ca xindxaa ni rudiiu naa
ne ca maniꞌ ni ruutuꞌ para naa.
9 Cadi canabaꞌ diaꞌ lii gusigáꞌdeluꞌ naa ti xhiúzeluꞌ
ne nin ca dendxuꞌ ngolab ni nuu ndaaniꞌ leꞌ xtiluꞌ;
10 xtinneꞌ nga guiráꞌ maniꞌ guiꞌxhiꞌ,
ne laaca xtinneꞌ guiráꞌ yuze ni canazá lu dani;
11 laaca xtinneꞌ ca maniꞌ ni ripapa lade ca dani
ne guiráꞌ ni rizá ndaaniꞌ guiꞌxhiꞌ.
12 Pa ñaca nindaana la? qué ninabadiáꞌ ni lii,
purtiꞌ xtinneꞌ nga guidxilayú ne guiráꞌ ni nuu ndaanini.
13 Ñee naluꞌ rahuaꞌ beela yuze,
o reeꞌ rini xtiꞌ dendxuꞌ ngola la?
14 ¡Bidii xquixe Diuxi casi ti xindxaa;
ne pa maꞌ bidii xtiidxaluꞌ laabe la? biꞌniꞌ ni!
15 Dxi chuꞌluꞌ xizaa la? bicaa ridxi naa;
naa zulaꞌyaꞌ lii,
ne lii zusisácaluꞌ naa.»
16 Diuxi rabi ca ni nadxabaꞌ:
«Xiñee cuzeetuꞌ ca diidxaꞌ biaꞌ xtinneꞌ,
xiñee cuzeetuꞌ diidxaꞌ ni bindiibeꞌ,
17 pa lii qué riuulaꞌdxuꞌ gulidxeꞌ lii
ne qué rusisácaluꞌ ca xtiidxaꞌ.
18 Ruxhalenouꞌ ruchagaluluꞌ gubaanaꞌ;
¡ne ridxaagaluꞌ ca ni riuune xheela binni!
19 Para gacuꞌ nadxabaꞌ ne para gusiguiiu la?
qué rutopa ruaaluꞌ.
20 Rindísaluꞌ diidxaꞌ luguiáꞌ bíꞌchiluꞌ;
¡riniꞌluꞌ bíꞌchiluꞌ ni guleneuꞌ!
21 Guiráꞌ ndiꞌ huayuꞌnuꞌ, ne naa huaganeꞌ;
bizulú xouꞌ casi lii naa.
Yanna chi guchayáꞌ cani luluꞌ,
¡chi guxhubadondaꞌ lii!
22 »Laganna chaahuiꞌ ca ndiꞌ, laatu ca ni rusiaandaꞌ Diuxi,
cadi mala si gusuluáꞌ guxuuxe laatu,
ne qué chuꞌ tu gulá laatu.
23 Ca ni rudii xquixe naa la? rusisacaꞌ naa.
¡Naa rulaꞌyaꞌ ca ni qué rireechú lu neza xtinneꞌ!»