Cadi bidxichi si nga guicá lunu
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ ni bicaa ca xiiñiꞌ Coré.
49
Laganna guiráꞌ xixetu,ganna guieꞌ, ganna guidxi xtiꞌ guidubi guidxilayú,
2 casica binni napa ne ni qué gapa,
casica binni napa guenda ne binni guidxi.
3 Chi guiniéꞌ ne guendabiaaniꞌ
ne diidxaꞌ ni riale ndaaniꞌ ladxiduáꞌ;
4 chi guzuubaꞌ xtiidxaꞌ ca diidxagola,
ne chigüéꞌ ti diidxaꞌ ni gaꞌchiꞌ ndaaniꞌ ladxiduáꞌ ne saa xtiꞌ arpa.
5 Xiñee guidxibeꞌ tideꞌ
lu ca dxi nagana zeeda,
dxi gutaaguꞌ guendanadxabaꞌ
xtiꞌ ca ni qué racalaꞌdxiꞌ naa ca.
6 Laacabe nabé ricá lúcabe xpidxíchicabe,
ne ruchácabe bi yannicabe tisi nápacabe,
7 xisi la? guirutiꞌ zanda gulá laaca laa,
ne qué zanda quixe lu náꞌ Diuxi tí ganda gulá laa.
8 ¡Gastiꞌ bidxichi ganda siꞌ xquendanabani miatiꞌ
9 tí qué chuꞌ dxi gatiꞌ, ne guilá lu náꞌ guendaguti!
10 Cahuínicani casica rati tobi rati stobi,
rati binni nuu xpiaaniꞌ ne rati binni qué ganna gastiꞌ,
ne rusaanacabe ca xpidxíchicabe lu náꞌ stobi.
11 Neca gudixhelácabe ca layú xtícabe,
baꞌ cabeza laacabe ra chibíꞌcabe ndaaniꞌ;
¡racá guiaanacabe guiráꞌ dxi, guiráꞌ gueelaꞌ!
12 Binni cadi zeeda para guicaa xcu ndaaniꞌ guidxilayú neca gapa bidxichi;
zati casica rati ca maniꞌ.
13 Zacá riluxe ca ni ricá lú laaca laa;
zacá riluxe ca ni ruchá naróꞌ xtiꞌ.
14 Para ca binni diꞌ, guendaguti zeeda gaca casi tuuxa ni rapa maniꞌa
ni riné laacabe ndaaniꞌ baꞌ
casi ñácacabe dendxuꞌ.
Dxi guiráꞌ gueelaꞌ,
zeeda ca ni nachaꞌhuiꞌ ne zaguiñeyú laacabe;
zará stipa xtícabe
ne zibíꞌcabe ra baꞌ.
15 Huaxa Diuxi zulá naa lu náꞌ guendaguti,
ne ziné naa ra nuu.
16 Cadi chuꞌluꞌ xizaa paꞌ tuuxa gapa bidxichi
ne guzuchaahuiꞌ ra lidxi,
17 tí dxi gátibe la? qué zinebeꞌ gastiꞌ,
xpidxíchibe qué zinanda laabe ra baꞌ.
18 Neca peꞌ chuꞌbe nayecheꞌ laga nabánibe,
ne gusisaca binni laabe ti nápabe stale bidxichi,
19 huaxa zadxiña dxi gátibe,
ne qué ziuu ruꞌ dxi gúꞌyabe biaaniꞌ.
20 Binni cadi zeeda para guicaa xcu ndaaniꞌ guidxilayú neca gapa bidxichi;
zati casica rati ca maniꞌ.