Guendasicarú xtiꞌ Sión, xquidxi Diuxi
Diidxariuundaꞌ rusisacanécabe Diuxi. Guendaruundaꞌ diidxaguieꞌ ni bicaa ca xiiñiꞌ Coré.
48
¡Aque nandxóꞌ nga Tata Diuxi!¡Naquiiñeꞌ guidunaxhii Diuxi xtinu
ndaaniꞌ xquidxi ne lu dani nandaayaꞌ xtiꞌ!
2 ¡Pabiáꞌ sicarú rihuini dani Sión,
chericaꞌ, neza guiaꞌ!
¡Laani nácani guendanayecheꞌ xtiꞌ guidxilayú!
¡Laani nga guidxi xtiꞌ Xaique roꞌ!
3 Ndaaniꞌ ca yoolaꞌhuiꞌ xtiꞌ Jerusalén nuu Diuxi;
laabe maꞌ biluiꞌbe tu laabe,
laabe zedagacabe casi ti yoo ra riáꞌpanu.
4 Bidagulisaa ca xaique
ne bicaalúcani;
5 ra bíꞌyacabe guidxi diꞌ, bidxagayaacabe,
gucadíticabe ne bixhooñecabe.
6 Biaaziꞌ dxiibi ndaaniꞌ ladxidóꞌcabe;
gunaaze yuubaꞌ laacabe, sica ti gunaa caxana;
7 casi ti bi yooxhoꞌ ruxuuxeluꞌ ca balaagaꞌ xtiꞌ Tarsis.
8 Ndaaniꞌ guidxi xtiꞌ Diuxi xtinu,
Tata Diuxi ni nandxóꞌ,
maꞌ bidúꞌyanu ne bizalunu
ni gúdxicabe laanu:
¡Diuxi zuzuhuaa dxiichibe Jerusalén!
9 Ay Diuxi,
galaa batóꞌ xhiúꞌduluꞌ
nabé riníꞌ íquedu guiráꞌ guendaranaxhii xtiluꞌ.
10 Ay Diuxi,
lu guidubi guidxilayú ridunaxhiiluꞌ
casi naquiiñeꞌ gudunaxhii láluꞌ.
Ne stipa xtiuꞌ ruꞌnuꞌ ni jneza.
11 ¡Guiecheꞌ dani xtiꞌ Sión!
¡Guichesa ca guidxi xtiꞌ Judá ne guendanayecheꞌ
runi ca diidxaꞌ nazaaca xtiuꞌ!
12 Lasá lagudii ti bieque Sión,
ne laugabaꞌ ca yoobiyéꞌa ni nápani;
13 laguuyaꞌ chaahuiꞌ lindaaguié ni nápani, ne ca yoolaꞌhuiꞌ xtini,
tí gápatu ni güínetu ca xhiágatu
14 zacá peꞌ nga Diuxi xtinu
ni qué gapa dxi gueelaꞌ guiluxe.
¡Laabe nga nácabe xaique xtinu ne qué ziuu dxi gusaanabe laanu!