Tata Diuxi nuuné laanu
Ni gudixhe xaique xtiꞌ ca binni ruundaꞌ. Diidxariuundaꞌ ne ca gueereꞌ xtiꞌ ca xiiñiꞌ Coré.
46
Diuxi nga naca lídxinu ne stipa xtinu;laabe racanebe laanu ra nuunu xizaa.
2 Nga nga runi qué zadxíbidinu neca gacadé guidxilayú,
neca guidiñentaa ca dani galaa batóꞌ nisadóꞌ,
3 neca cuꞌ beedxeꞌ nisadóꞌ ne guindaabini,
neca gacaditi ca dani runi xiana xtini.
4 Nisa cuxooñeꞌ xtiꞌ guiiguꞌ rusiécheni guidxi xtiꞌ Diuxi,
ti guidxi ni jma nandaayaꞌ xtiꞌ Diuxi ni nandxóꞌ.
5 Diuxi nuu galahuini ne laa naaze ni;
Diuxi zacané ni ra ziyaba biaaniꞌ.
6 Ca guidxi riguu beedxecaꞌ, racadíticaꞌ,
guidxilayú racadé ra gucaabe ridxi.
7 ¡Tata Diuxi ni nadxóꞌ nga nuu ne laanu!
¡Diuxi xtiꞌ Jacob nga cayapa laanu!
8 Lataꞌ gúꞌyatu guiráꞌ ca guendaridxagayaa
ni huayuni Diuxi ndaaniꞌ guidxilayú:
9 bicaa nátibe guendaridinde
lu guidubi guidxilayú;
gulúzabe guiráꞌ ca baza,
binidebe ca yagaguí,
¡ne bizaaquibe ca piquiiliguía!
10 «¡Lagusaba ique!
¡Laganna naa nga Diuxi!
¡Naa nuaꞌ luguiáꞌ guiráꞌ ca guidxi!
¡Naa nuaꞌ luguiáꞌ guidxilayú!»
11 ¡Tata Diuxi ni nadxóꞌ nga nuu ne laanu!
¡Diuxi xtiꞌ Jacob nga cayapa laanu!