Diidxaguieꞌ ni biete lu xquendaxheelaꞌ xaique roꞌ
Ni gudixhe xaique xtiꞌ ca binni ruundaꞌ, sica rixidxi saa xtiꞌ «Los lirios». Diidxaguieꞌ bicaa ca xiiñiꞌ Coré. Diidxariuundaꞌ xtiꞌ guendaranaxhii.
45
Stale diidxaꞌ sicarú cayale ndaaniꞌ iqueꞌ;ruaaꞌ, zedagacani casi ti duubiꞌ xtiꞌ binni rucaa diidxaꞌ.
¡Chi guiniéꞌ diidxaguieꞌ xtinneꞌ neza lú xaique roꞌ!
2 ¡Lii nga ti baꞌdunguiiu ni jma sicarú lade guiráꞌ baꞌdunguiiu!
¡Nabé sicarú guiráꞌ diidxaꞌ ni riree ruaaluꞌ!
Ngue runi qué zusaana Diuxi de cuꞌ ndaayaꞌ lii.
3 ¡Bicaa guiibaꞌ duxhuꞌ xtiluꞌ cueꞌluꞌ, beedxeꞌ!
¡Ti laani nga ruzuchaahuini lii!
4 Guendanazaaca xtiuꞌ nga saluꞌ dxiichiꞌ,
tinduꞌ runi ni dxandíꞌ,
ne gusisácaluꞌ xtiidxaꞌ ca binni nazíꞌ.
¡Náꞌ ndígaluꞌ huayuni stale guendaridxagayaa!
5 Ca guidxi ca riábacaꞌ xañeeuꞌ xaique roꞌ;
ca bazandíꞌ xtiuꞌ naduxhucaꞌ ne ridaabicaꞌ
ladxidóꞌ ca ni nanalaꞌdxiꞌ lii.
6 Ay Diuxi, guendaraca ni naluꞌ, que ziuu dxi guiluxe,
laani nga ti guendanandxóꞌ ni runi jneza.
7 Nadxiiluꞌ guendanachaꞌhuiꞌ ne nanaláꞌdxiluꞌ guendanadxabaꞌ.
Ngue runi gulí Diuxi lii, Diuxi xtiuꞌ,
bichabe ladxidoꞌloꞌ de guendanayecheꞌ
jma que ca binni ni ridaaguluꞌ.
8 Guiráꞌ xhábaluꞌ rindáꞌ naxhi cani mirra, áloe ne canela;
ne saa xtiꞌ yagalé
rusiéchecabe lii ndaaniꞌ ca yoolaꞌhuiꞌ ni guyaꞌné marfil.
9 Lade guiráꞌ gunaa ni nuu ndaaniꞌ yoolaꞌhuiꞌ xtiuꞌ nuu badudxaapaꞌ guiéꞌ;
neza náꞌ ndígaluꞌ zuba gunaa ni naca xaique roꞌ,
zuchaahuiné oro chaꞌhuiꞌ.
10 Bicaadiaga, xiiñedxaapaꞌ;
bicaadiaga chaahuiꞌ ni chi guidxe lii riꞌ:
Bisiaandaꞌ ca lisaaluꞌ ne xpínniluꞌ,
11 tí xaique roꞌ xtinu cayuláꞌdxibe lii;
laabe nga xpixuaanaluꞌ ne naquiiñeꞌ guzuubaluꞌ xtiidxabe.
12 Badudxaapaꞌ guiéꞌ xiiñiꞌ ca xaique xtiꞌ Tiro,
ca binni ni jma napa bidxichi ni nuu ndaaniꞌ guidxi,
birá ruꞌ ni cuchaacaꞌ lii ti gusiguendaluꞌ gucaadiaꞌguꞌ laacaꞌ.
13 ¡Raríꞌ zedayuu badudxaapaꞌ guiéꞌ, xhianga sicarube yaꞌ!,
¡dede riaquibiaaniꞌ xhábabe nuchaꞌ oro!
14 Zuchaahuibe ruchíñacabe laabe ra nuu xaique roꞌ,
nanda ca guzanahuiiniꞌa xtibe laabe,
ne ti ludoo badudxaapaꞌ ridxaagabe.
15 Rizácabe nayecheꞌ;
dxaꞌ tipa ladxidóꞌcabe riuucabe ndaaniꞌ yoolaꞌhuiꞌ xtiꞌ xaique.
16 Ca xiiñuꞌ, xa xaique,
laaca zácacaꞌ xaique casi ca bixhozegolaluꞌ,
ne lii zuꞌnuꞌ gacaꞌ ni nácabe lu guidubi guidxi.
17 Naa zuneꞌ ca ni cayalé ruꞌ
guietenaláꞌdxicaꞌ láluꞌ,
ne guiráꞌ guidxi gusisaca lii dxi ne gueelaꞌ.