Ti guendariuundaꞌ ni rinabanécabe Diuxi gacané
Ni gudixhe xaique xtiꞌ ca binni ruundaꞌ. Diidxaguieꞌ bicaa ca xiiñiꞌ Coré.
 
44
Ay Diuxi,
ne diágadu huayunadiágadu,
ne bixhózedu huayabi laadu
ni bíꞌniluꞌ lu ca dxi xtícabe,
ca dxi ni maꞌ gudiꞌdiꞌ,
2 ne nápiouꞌ guladxuꞌ
ca binni qué ricaa xtiidxaluꞌ,
bisáꞌbiluꞌ ca guidxi roꞌ,
ne bisaanaluꞌ ca bixhózedu lu ca layú xtícabe.
3 Cadi nádiꞌcabe nin ca xquiibacabe
nga gudiñe ca binni ni qué ricaa xtiidxaluꞌ;
cadi laadicabe nga gucuaacabe layú que.
¡Guendanandxóꞌ xtiuꞌ, ne stipa xtiluꞌ!
¡Ne xtuxhuluꞌ,
biꞌnuꞌ ni ti nabé gunaxhiiluꞌ laacabe!
 
4 ¡Xaique roꞌ xtinneꞌ!
¡Diuxi ni bizáꞌ naa!
lii nga gundísaluꞌ ca xpínniluꞌ;
5 runi lii nga bixhatañeedu ca ni nanalaꞌdxiꞌ laadu;
¡bicaꞌ rídxiduꞌ lii ngue runi gunda bituñeedu ca ni cucaalú laadu!
6 Qué nibezadiáꞌ nulá baza,
ne guiibaꞌ duxhuꞌ xtinneꞌ naa;
7 lii nga gudiñuꞌ ca ni nanalaꞌdxiꞌ laadu,
lii nga bisutuiluꞌ lú ca ni qué racalaꞌdxiꞌ laadu.
8 ¡Ay Diuxi, dede zadxá tipa ruaaduꞌ nga guzéꞌtedu láluꞌ,
ne nabé zusisácadu lii!
 
9 Huaxa maꞌ bidxiidecheluꞌ laadu;
ne nabé maꞌ bizutuiluꞌ ludu.
Ne maꞌ qué rinaluꞌ guireeneluꞌ ca xpínniduꞌ.
10 Bicuí salu laadu neza lú ca ni nanalaꞌdxiꞌ laadu;
ca ni qué racaláꞌdxicaꞌ laadu la?
ribaꞌnaꞌ ca xtidu,
ne ricaacaꞌ ni racaláꞌdxicaꞌ.
11 Bidiiu laadu
sica rudiicabe ti dendxuꞌ chi gati;
ne bicheechendaseluꞌ laadu lade ca binni qué ricaa xtiidxaluꞌ;
12 gulee diiñeluꞌ ca xpínniluꞌ,
ne xi gulee nduluꞌ ra bitooloꞌ laacabe.
13 Maꞌ biꞌnuꞌ laadu casi ti guidxa;
ca binni dxaagadu la? rugaandacaꞌ laadu ne ruxídxicaꞌ laadu.
14 Bisaanuꞌ laadu para guxidxi ca binni ca ni qué ricaa xtiidxaluꞌ laadu;
ora gúꞌyacaꞌ laadu, runiibi íquecaꞌ.
15 Qué guini dxi qué nituí luáꞌ;
cayuuti xtuí diꞌ naa
16 runi xtonda ni nanalaꞌdxiꞌ naa, racalaꞌdxiꞌ guquixe naa xiixa,
rugaanda naa, ne riguite naa.
 
17 Guiráꞌ ni bizaacaduꞌ diꞌ
cadi bizaacadu ni ti bisiáꞌndaduꞌ lii.
¡Nin qué huaxaledu de lii!
18 Qué huacá íquedu gusaanadu lii
nin gaxha ñeedu lu xnezaluꞌ.
19 Huaxa lii la? huaxhateñeeluꞌ laadu
lu xilate xtiꞌ guendanazíꞌ.
¡Bisaanuꞌ laadu lu gueelacahui roꞌ!
20 Ay Diuxi, pa ñaca nusiáꞌndadu lii,
ne nuchaꞌdu lii runi xti bidóꞌ gadxé,
21 lii ca ñannu ni,
purtiꞌ lii runibiaꞌluꞌ guiráꞌ ni nagaꞌchiꞌ nuu ndaaniꞌ ladxidóꞌ miatiꞌ.
22 Runi lii gatigá
nuudu ruaa bandaa xtiꞌ guendaguti;
nápacabe laadu casi ti dendxuꞌ chi gati.
 
23 Tata Diuxi, xiñee nisiaasiluꞌ.
¡Bibani, bibani!
¡Cadi gudxii dechecouꞌ laadu!
24 Xiñee rucachiluluꞌ.
Xiñee cusiaandaluꞌ laadu,
cayacanadu stale, stale peꞌ.
25 Maꞌ bidiiñedu, néxhedu layú,
zixubi ládidu layú.
26 ¡Biasa,
gudáꞌ gacaneuꞌ laadu,
ne bilá laadu ne guendaranaxhii xtiuꞌ!