Diuxi nga ca luáꞌ
Ni gudixhe xaique xtiꞌ ca binni ruundaꞌ. Diidxaguieꞌ bicaa ca xiiñiꞌ Coré.
42
Casi ribidxiaa ti bidxiña ra cayati nisa,zacá, Diuxi xtinneꞌ, ladxiduáꞌ ruyubi lii.
2 Cayateꞌ nisa, nisa xtiꞌ Diuxi, Diuxi xtiꞌ guendanabani.
Padxí ti ndiꞌ zanda guidxiñaꞌ lú Diuxi yaꞌ.
3 Dxi ne gueelaꞌ, cayuunaꞌ cayeeꞌ nisa cadá luáꞌ,
laga canaba diidxacabe naa guiráꞌ dxi:
«Paraa nuu Diuxi xtiuꞌ.»
4 Ora riníꞌ iqueꞌ guiráꞌ ndiꞌ la?
rundaaꞌ lu xtoo yuubaꞌ xtinneꞌ.
Redasilú naa dxi guzayaniruáꞌ lu guiráꞌ binni que,
ma ziniáꞌ laacaꞌ ndaaniꞌ yuꞌduꞌ xtiꞌ Diuxi
lade ridxi yecheꞌ ne nazaaca.
¡Aque sicarú nga ca saa que xa!
5 Xiñee guixhacaladxeꞌ.
Xiñee chuaaꞌ xizaa.
Pa Diuxi nga ca luáꞌ,
ni gusisacaruáꞌ.
¡Laabe nga Diuxi ni bizáꞌ naa ne ni rulá naa!
6 Nayati nuu ladxiduáꞌ.
Nga nga runi nabé ricá ique lii
dede lu xilatea xtiꞌ guiiguꞌ Jordán,
dede ndaaniꞌ guiꞌxhiꞌ Hermón ne Misar.
7 Casi riuu lé ra riaba nisa ruaa ti bandaa
zacaca nga ridxi guiibaꞌ xtiuꞌ;
ca nisa xoo ruseendaluꞌ
maꞌ gudidíꞌcani luguiaꞌyaꞌ.
8 Ridxíꞌ Tata Diuxi ruseendaꞌ xquendaranaxhii ra nuaaꞌ,
ne naa lu gueelaꞌ qué riaanadxiéꞌ de guundaꞌ
nin ca guundaꞌ ndaayaꞌ xtiꞌ Diuxi xtinneꞌ.
9 Rabeꞌ Diuxi, ni rulá naa:
«Xiñee maꞌ bisiaandaluꞌ naa.
Xiñee ndiꞌ chuaaꞌ naguunduꞌ
ne guxhii ca ni nanalaꞌdxiꞌ naa ca naa.»
10 Dede maꞌ riuubaꞌ ca dxita ladeꞌ
runi ca diidxaꞌ stuí xtiꞌ ca ni nanalaꞌdxiꞌ naa ca,
gatigá rinaba diidxacabe naa:
«Paraa nuu Diuxi xtiuꞌ.»
11 Xiñee guixhacaladxeꞌ.
Xiñee chuaaꞌ xizaa.
Pa Diuxi nga ca luáꞌ,
ni gusisacaruáꞌ.
¡Laabe nga Diuxi xtinneꞌ, ni rulá naa!