Ni rinabaꞌ binni huará lu Tata Diuxi
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David.
41
Aque nayecheꞌ nga miatiꞌ ni racané binni nazíꞌ ne binni chibáꞌ;tí Tata Diuxi zulá laabe lu gubiña.
2 Zapa Tata Diuxi laacaꞌ,
ne zudiibe laacaꞌ guendanayecheꞌ ne guendanabani ndaaniꞌ guidxilayú riꞌ,
ne zulabe laacaꞌ lu náꞌ ca ni nanalaꞌdxiꞌ laacaꞌ.
3 Zudii Tata Diuxi laacaꞌ stipa, lu luunaꞌ yuubaꞌ xticaꞌ;
¡ne zúnibe xquendahuaracaꞌ guendanazaaca!
4 Naa rinabaꞌ lii:
«Tata Diuxi, bilaselaꞌdxiꞌ naa;
bisianda naa, neca huacheeniáꞌ lii.»
5 Ca ni nanalaꞌdxiꞌ naa racaláꞌdxicaꞌ gacanaꞌyaꞌ, ne nacaꞌ:
«Pa dxi gátibe pue, pa dxi guixá lábe raríꞌ.»
6 Redagánnacaꞌ naa ruluíꞌ peꞌ dxandíꞌ ni laacaꞌ;
ndaaniꞌ íquecaꞌ rápacaꞌ ni nadxabaꞌ,
ne ora guireecaꞌ lu neza ribeendatecaꞌ guiráꞌ ni.
7 Ca ni nanalaꞌdxiꞌ naa racacaꞌ tobi si ne riniꞌcaꞌ naa;
ruzulucaꞌ, xtondaꞌ nga cayuniná naa,
8 Ne nacaꞌ:
«Binnidxabaꞌ nga nuguu laabe zacá;
maꞌ nexhebe maꞌ qué ziuu dxi guiásabe.»
9 Dede xhamiguaꞌ ni jma nadxieeꞌ,
ni gudahuaniáꞌ laa tobi si, maꞌ bidxiideche naa.
10 Tata Diuxi, bilaselaꞌdxiꞌ naa;
gundisaꞌ naa tí ganda guquíxeni laacabe.
11 Ra gundisuꞌ naa diꞌ, zannaꞌ nadxiiluꞌ naa:
tí cadi guiecheꞌ ca ni nanalaꞌdxiꞌ naa.
12 Naa la? qué huayuu dxi gucheeniáꞌ lii,
guluu naa ndaaniꞌ náluꞌ,
ne bizuhuaa naa neza luluꞌ.
13 ¡Nandaayaꞌ nga Tata Diuxi, Xpidóꞌ Israel,
dxi ne gueelaꞌ,
¡Sica riꞌ gácani!