Nabé riuuladxeꞌ nga guneꞌ, ni racalaꞌdxuꞌ xa Tata Diuxi
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David.
 
40
Gucualuáꞌ Tata Diuxi,
ne laabe biguudebe neza ra nuaa ne bicaadiagabe ca ridxiyuunaꞌ xtinneꞌ;
2 Guleebe naa ndaaniꞌ baꞌ,
ne bilabe naa ñaazeꞌ ndaaniꞌ ti beñe stroocoꞌ.
Bizuhuaa dxiichibe naa lu ti guie ngola;
ne guluube stipa ñeeꞌ tí ganda sayaꞌ.
3 Bisiálebe ti saa cubi ndaaniꞌ ruaaꞌ,
ti saa nayecheꞌ ni bisisacaniáꞌ Diuxi xtinu.
Guiráꞌ tu biꞌyaꞌ ndiꞌ la? biguudxi ladxidóꞌ,
ne gucuá lucaꞌ Tata Diuxi.
4 ¡Aque nayecheꞌ nga riuu binni ni rucaa ruaa Tata Diuxi
ti qué ruyubi neza xtiꞌ ca ni qué guiquiiñeꞌ
ne ca ni rusisaca bidóꞌ!
 
5 Tata Diuxi ni bizáꞌ naa,
nabé stale guendaridxagayaa nga ni maꞌ biꞌnuꞌ,
ne nabé huayapa xpiaꞌluꞌ ne laadu.
¡Gastiꞌ ruꞌ stobi casi lii!
Ñacaladxeꞌ nuzeeteꞌ cani, niniéꞌ cani,
xisi la? qué gápacani xigabaꞌ.
 
6 Lii qué riechediouꞌ guuticabe tuuxa maniꞌ neza luluꞌ
o guinabuꞌ xubastiáa;
ne laaca qué rinabaluꞌ guzaaquicabe maniꞌ neza luluꞌ
ninca guinabuꞌ guna quixené binni xtonda.
Lagala, bisiaaniluꞌ diagaꞌ.
7 Ngue runi guniéꞌ:
«Raríꞌ nuaaꞌ,
casi cuzeeteꞌ guiꞌchiꞌ ca naa.
8 Nabé riuuladxeꞌ guneꞌ ni racalaꞌdxuꞌ xa, Diuxi ni bizáꞌ naa;
¡ndaaniꞌ ladxiduáꞌ nga ziniáꞌ guiráꞌ xtiidxaluꞌ!»
9 Neza lú guiráꞌ xixé xpínniluꞌ
huaniéꞌ ni jneza.
¡Lii ca nannuꞌ, Tata Diuxi, qué hayanadxiéꞌ de guiniéꞌ!»
10 Qué huaganeꞌ de guzeeteꞌ diidxaꞌ jneza xtiuꞌ;
riniéꞌ tobi si nga ladxidoꞌloꞌ ne rulaluꞌ.
Qué huayuu dxi gucaacheꞌ xquendaranaxhiiluꞌ ne xquendadxandiluꞌ
neza lú guiráꞌ xixé xpínniluꞌ.
 
11 Ne lii, Tata Diuxi, ¡cadi gusaanuꞌ de guilaseláꞌdxiluꞌ naa!
¡Dxi gueelaꞌ gapaꞌ xquendaranaxhiiluꞌ ne xquendahuandíꞌ láꞌdxiluꞌ naa!
12 Maꞌ huazaacaꞌ stale guendanazíꞌ
ca ni qué lica ganda ugabaꞌ.
Guiráꞌ guendanadxabaꞌ ni maꞌ bineꞌ;
laca laacani maꞌ bitagunácani naa;
¡dede maꞌ bisucheepacani luáꞌ!
Jma stale cani que guicha iqueꞌ,
dede maꞌ nayati bisaanani naa.
 
13 Tata Diuxi, gudáꞌ laꞌ ¡gudáꞌ gulaluꞌ naa!
Tata Diuxi ¡guiubagá gudáꞌ gacaneuꞌ naa!
14 ¡Guituí lú guiráꞌ
ca ni racalaꞌdxiꞌ guxhatañee naa!
¡Guituí lú ne guxooñeꞌ
ca ni racalaꞌdxiꞌ guniná naa!
15 ¡Guxooñeꞌ xtuí
ca ni cuxidxi naa!
16 Huaxa guiráꞌ tu guyubi lii
guidxá tipa ladxidóꞌ de guendanayecheꞌ;
tí guiráꞌ tu racalaꞌdxiꞌ gulaluꞌ laa
guiráꞌ dxi guiníꞌ:
«¡Aque nandxóꞌ nga Tata Diuxi xa!»
 
17 Ne naa, nuaa nazíꞌ ne nuu xizaa ladxiduáꞌ,
cadi gusiaanduꞌ naa, Tata Diuxi.
Lii nga racaneuꞌ ne rulaluꞌ naa;
¡cadi guindoou, Diuxi xtinneꞌ!