Ti lu bi nga guendanabani
Ni gudixhe xaique xtiꞌ ca binni ruundaꞌ. Xtiꞌ Jedutún. Guendaruundaꞌ diidxaguieꞌ bicaa David.
39
Naa guniéꞌ gapaꞌ xpiaꞌyaꞌ,ne cadi gucheeniáꞌ ludxeꞌ,
ne gucueezaꞌ ruaaꞌ
neza lú ca binni nadxabaꞌ ni zuhuaa luáꞌ.
2 Bineꞌ naa sica ni nayati ruaa: qué niniéꞌ gastiꞌ.
¡Nin xtiidxaꞌ guendanachaꞌhuiꞌ qué nuzeeteꞌ!
Huaxa yuubaꞌ xtinneꞌ zidale;
3 ¡bidaa xiana ladxiduáꞌ!
Ra caníꞌ iqueꞌ, gudó dí naa,
ne bicaa ti ridxi ngola:
4 «Tata Diuxi gudxi naa xi gaca xa de naa
pabiáꞌ iza nga guibaneꞌ,
tí ganna pabiáꞌ nga nachucu guendanabani xtinneꞌ.
5 Guendanabani ni bidiiluꞌ naa ca la? nabé nachucuni;
gastiꞌ nga xquendanabaneꞌ neza luluꞌ.
¡Guendanabani xtiꞌ guiráꞌ binni zeedayaca casi ti guendaricaalaꞌdxiꞌ!
6 ¡Casi ti bandáꞌ nga ridiꞌdiꞌ binni!
Xi para gutalebe bidxichi,
pa qué gánnabe tu laa guiananeni.
7 Ne zacá, Tata Diuxi, xiindiꞌ zanda cuezaꞌ,
¡Lii nga ca luá!
8 Bilá naa lu ca xtondaꞌ;
cadi gudiiu naa guxidxi ca binni qué riene ca naa.
9 »Bineꞌ naa casi binni nayati ruaa ne qué nuxhaleꞌ ruaaꞌ,
tí lii nga cayuni xhiiñaluꞌ.
10 Maꞌ cadi quiñerouꞌ naa;
maꞌ bitinati naꞌluꞌ ca naa.
11 Lii rulídxiluꞌ binni ra rusabanaluꞌ guendanadxabaꞌ xtiꞌ,
ne runideluꞌ guiráꞌ ni jma nadxiibe.
¡Guiráꞌ binni naca ti guendaricaalaꞌdxiꞌ!
12 »Tata Diuxi, bicaadiaga naa canieniáꞌ lii,
¡bicaadiaga ca guenda ruunaꞌ xtinneꞌ!,
¡bicabi naa ora ma cuyuunaꞌ!
Naa zedagacaꞌ casi ti dxuꞌ neza luluꞌ,
casi ti maniꞌ huiiniꞌ ripapa ne zidiꞌdiꞌ si,
casi gucaꞌ ca bixhozeꞌ golaꞌ.
13 Bisaana naa stubeꞌ tí ganda guicaaꞌ caadxi bi,
laga ganda chaaꞌ, gaxhañee ndaaniꞌ guidxilayú diꞌ ne gateꞌ.»