Ndaayaꞌ ra rinabaꞌ binni gacané Diuxi laa
Guendaruundaꞌ diidxaguieꞌ bicaa David, ni gusietenalaꞌdxiꞌ.
38
Tata Diuxi, cadi tindeneuꞌ naa ora cadxiꞌchuꞌ,ne cadi gusabanaluꞌ naa ora nualuꞌ xiana.
2 Bidaabi ca bazandíꞌ xtiluꞌ ladeꞌ;
¡ne bisabanaluꞌ naa!
3 Bichiichi ca donda xtinneꞌ lii,
guidubi ladeꞌ huará;
¡nin ti dxitaladeꞌ cadi nazaaca!
4 Naꞌniꞌ ca guendanadxabaꞌ xtinneꞌ naa;
nanaacani, qué ganda guáyacani.
5 Runi qué ruzuubaꞌ diidxaꞌ,
cayuꞌdxuꞌ ne candaꞌ dxabaꞌ ra cayaca xiroo ladeꞌ.
6 Guidubi dxi naguunduꞌ riuaaꞌ,
nisi canagutaabeꞌ iqueꞌ ne nisi nuaa guunaꞌ.
7 Cusiana xindxaꞌ decheꞌ;
¡huará guidubi nacaꞌ!
8 Nayati nuu ladeꞌ maꞌ qué gapaꞌ stipa;
¡cayuunaꞌ ne yuubaꞌ xtiꞌ ladxiduáꞌ!
9 Tata Diuxi lii nannuꞌ xi guiráꞌ racalaꞌdxeꞌ,
¡lii nannuꞌ xiñee ricaalaꞌdxeꞌ!
10 Nagueenda ripapa ladxiduáꞌ,
maꞌ qué gapaꞌ stipa,
¡cachuunduꞌ luáꞌ!
11 Ca ni jma xhamiguaꞌ ne dede ca lisaa xtinneꞌ,
bireechucaꞌ de naa zuhuaacaꞌ zitu, ti cayaca xiroo ladeꞌ.
12 Ca ni racalaꞌdxiꞌ guuti naa la? riguixhecaꞌ xaléꞌ naa;
ca ni racalaꞌdxiꞌ guniná naa, riniꞌcaꞌ zuxuuxecaꞌ naa,
ne guidubi dxi caníꞌ íquecaꞌ quiñeyucaꞌ naa.
13 Naa runeꞌ naa diagacuaataꞌ, sica ni qué runadiaga;
casi ñacaꞌ ti binni nayati ruaa, qué ruxhaleꞌ ruaaꞌ.
14 Zedagacaꞌ casi tobi ni qué runa
ni qué zanda gulá laca laa.
15 Ribeeza, Tata Diuxi ni bizáꞌ naa,
lii nga gucábiluꞌ laacabe.
16 Ni rinabaꞌ siáꞌ nga qué chi guxídxicabe naa,
ne qué gúꞌndacabe saa nayecheꞌ dxi naa guiabaꞌ.
17 Huandíꞌ peꞌ maꞌ yaca guiabaꞌ;
ca yuubaꞌ xtinneꞌ cadi cuchaachacani naa.
18 ¡Maꞌ chi guxhuubaꞌ guiráꞌ ca xtondaꞌ,
maꞌ nuguucani naa xizaa!
19 Maꞌ bidale ca ni nanalaꞌdxiꞌ naa;
ne nuu stale tu nanalaꞌdxiꞌ naa sin ñune laacaꞌ gastiꞌ.
20 Ne guendanadxabaꞌ gudixecabe guendanachaꞌhuiꞌ xtinneꞌ;
cucaalúcabe naa tisi cuyube guneꞌ ni jneza.
21 Tata Diuxi, ¡cadi gusaanuꞌ naa xtubeꞌ!
Diuxi ni bizáꞌ naa, ¡qué chi guixaleluꞌ de naa!
22 Diuxi xtinneꞌ ni rulá naa, ¡chixhe gudáꞌ gacaneluꞌ naa!