Gucualú lu xtiidxaꞌ Tata Diuxi
Guendaruundaꞌ diidxaguieꞌ bicaa David.
37
Cadi guchiichi ca binni nadxabaꞌ lii,ne cadi gacheluluꞌ xtícabe,
2 tí nagueenda ribídxicabe casi guixibeeuꞌa;
¡ne riguunducaꞌ casi guixiyaa!
3 Gucualú lu xtiidxaꞌ Tata Diuxi ne biꞌniꞌ ni jneza,
bibani ndaaniꞌ guidxilayú ne cadi gucheeluꞌ.
4 Gunaxhii Tata Diuxi ne guendanayecheꞌ,
laabe zudiibe lii ni canabaꞌ ladxidoꞌloꞌ.
5 Gulaꞌquiꞌ xquendanabaniluꞌ ladxináꞌ Tata Diuxi;
gucualú laabe, ne laabe zacanebe lii.
6 Zuzaanibe guendanachaꞌhuiꞌ xtiluꞌ ne guiráꞌ ni ruꞌnuꞌ jneza
casi ruzaaniꞌ gubidxa galaa dxi.
7 Neza lú Tata Diuxi qué chi guiniꞌluꞌ gastiꞌ;
guleza laabe zacanebe lii.
Qué chi gunuꞌ xiana ti cadale xtiꞌ stobi,
ca ni riníꞌ ique guni guendanadxabaꞌ.
8 Bisaana xiana ca,
cadi gacuꞌ naduxhuꞌ;
cadi guidxiichuꞌ,
pacaa zusiroobaluꞌ guendanagana xtiuꞌ.
9 Ca binni nadxabaꞌ la? zulaagacabe laacaꞌ ndaaniꞌ guidxilayú,
ne binni rucaa ruaa xtiidxaꞌ Tata Dixi la?
zaca xticaꞌ guidxilayú.
10 Stuudxi si la? maꞌ qué zahuinni binni nadxabaꞌ;
neca peꞌ guyubuꞌ laacabe, maꞌ qué zadxeꞌluꞌ laacabe.
11 Ca binni nadóꞌ zacaacaꞌ guidxilayú
ne zabánicaꞌ dxidóꞌ.
12 Binni nadxabaꞌ nisi ruyubi guniná binni nachaꞌhuiꞌ,
ne ruuyaꞌ tuxhube laa.
13 Tata Diuxi ruxidxi si laabe,
laa nanna maꞌ zeedadxiña dxi xtibe.
14 Ca binni nadxabaꞌ ribeecaꞌ xquiibacaꞌ ne rusutipacaꞌ baza xticaꞌ
ni rusabanécabe ca binni nadóꞌ ne binni nazíꞌ,
¡cuyúbicabe guuticabe binni nachaꞌhuiꞌ!
15 Xisi la? laca xquiibacabe zadaabi ladxidóꞌcabe,
ne baza xtícabe zacadé.
16 Ni huaxiéꞌ xtiꞌ binni nachaꞌhuiꞌ
jma sicarú ni que ni stale xtiꞌ binni nadxabaꞌ.
17 Tata Diuxi zunitilube ca binni nadxabaꞌ,
ne zanazedxiichibe ca binni nachaꞌhuiꞌ.
18 Rapa Tata Diuxi ca ni nabani jneza,
ne layú ni gucuaacabe la? qué zará.
19 Ca dxi nagana, neca nuu gubiña,
qué zácacabe xtuí, tí zápacabe ni gócabe.
20 Ca binni nadxabaꞌ ziáꞌquicaꞌ casi guixi bidxi;
ca ni nanalaꞌdxiꞌ Tata Diuxi zanitilucaꞌ casi guꞌxhuꞌ.
21 Binni nadxabaꞌ riguiiñeꞌ ne qué riguixe,
binni nachaꞌhuiꞌ la? riálaꞌdxiꞌ ne racané.
22 Ca binni ni riguu ndaayaꞌ Tata Diuxi la? zabani ndaaniꞌ guidxilayú,
ne ca ni riguube dí la? zacadecaꞌ.
23 Tata Diuxi nga ruluíꞌ xi neza sáꞌ binni,
ne ruzuhuaabe laacaꞌ lu ti neza ni riuuláꞌdxibe.
24 Nga nga runi neca peꞌ guiábacaꞌ,
laabe naazebe nacaꞌ.
25 Naa gucaꞌ nahuiiniꞌ, yanna maꞌ bioxhuaꞌ,
qué ñuu diꞌ dxi ñuuyaꞌ nizarenda binni nachaꞌhuiꞌ,
ne qué ñuu diꞌ dxi ñuuyaꞌ ca xiiñicabe ninabaꞌ guna.
26 Dxi gueelaꞌ cayabe binni ne cayacanebe;
ca xiiñibe nandaayacaꞌ.
27 Bixaleꞌ lu xneza guendanadxabaꞌ ne biꞌniꞌ jneza,
zacá qué ziaadxaꞌ lii ti yoo ra cuézaluꞌ.
28 Tata Diuxi nadxii ni raca jneza,
ne que rusaanabe ca binni huandíꞌ ladxidóꞌ;
huaxa ca ni nadxabaꞌ la? ruxhatañeebe laacaꞌ,
ne ráxhabe laacaꞌ de xcú.
29 Ca binni nachaꞌhuiꞌ nga zacaacaꞌ guidxilayú,
ne qué zaluxe guendanabani xticaꞌ ndaaniꞌ ni.
30 Binni nachaꞌhuiꞌ riníꞌ ne stale guendabiaaniꞌ;
binni nachaꞌhuiꞌ riníꞌ diidxaꞌ jneza.
31 Ndaaniꞌ ladxidoꞌbe zinebe xtiidxaꞌ Diuxi xtibe;
¡ne qué ziuu dxi guxooñeꞌ ñeebe!
32 Binni nadxabaꞌ nisi rundaachiꞌ binni nachaꞌhuiꞌ,
cuyubibe guutibe laa;
33 xisi la? Tata Diuxi qué zusaana laabe lu náꞌ ca binni nadxabaꞌ,
ne qué zaná diꞌ gudxiibacabe donda íquebe.
34 Bicaruaa Tata Diuxi ne bizubaꞌ xtiidxaꞌ,
laabe zúnibe lii nandxóꞌ ne zudiibe lii ti guidxi.
¡Ne zuyadxiichiluꞌ guiluxe ca binni nadxabaꞌ!
35 Huayuuyaꞌ binni nadxabaꞌ, ruchá naróꞌ xtiꞌ,
nuchiaanáꞌ casi ti yaga roꞌ nagáꞌ;
36 peru zeꞌ, biluxe guendanabani xtiꞌ;
biyubeꞌ laabe ne maꞌ qué ñuuyaꞌruáꞌ laabe.
37 Biiyaꞌ guꞌyuꞌ binni nachaꞌhuiꞌ ni qué guzaabiꞌ gastiꞌ:
cabeza ti guendanabani dxidóꞌ laabe.
38 Ca ni que ruzuubaꞌ diidxaꞌ zacadecaꞌ,
ne ca dxi zeeda xtiꞌ ca binni nadxabaꞌ zacadé.
39 Tata Diuxi nga racané binni nachaꞌhuiꞌ,
ne laabe nga rulabe laaca lu ca dxi nagana.
40 Tata Diuxi racané laacabe guilácabe.
Ribeebe laacaꞌ lu náꞌ ca binni nadxabaꞌ,
ne rulabe laacaꞌ,
tí biyúbicabe laabe gacanebe laacaꞌ.