Guendanadxabaꞌ xtiꞌ binni ne guendanachaꞌhuiꞌ xtiꞌ Diuxi
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David, ni runi xhiiñaꞌ Tata Diuxi.
36
Guendanadxabaꞌ riníꞌndaaniꞌ ladxidóꞌ binni qué guiquiiñeꞌ.
Qué riuu dxi diꞌ tidi lu xquendabiaanibe
guidxíbibe Diuxi.
2 Ruzulú laa nga jma risaca,
ne qué ruuyaꞌ pabiáꞌ nga dxibadí xquenadxabaꞌ.
3 Riníꞌ huati ne rusugii,
maꞌ zeꞌ xpiaaniꞌ, maꞌ qué runi jneza.
4 Nexheꞌ lu luunaꞌ, nisi caníꞌ ique guni guendanadxabaꞌ;
nadxixhaatabe xquendanadxababe,
qué nabe gusaanabe ni.
5 Xquendaranaxhiiuꞌ, Tata Diuxi, rindani guibáꞌ;
ne guendahuandilaꞌdxiꞌa xtiuꞌ rindani guibáꞌ nasiá.
6 Guendaruni jneza xtiuꞌ nácani casi ti dani roꞌ;
ca xtiidxaluꞌ nácani casi ti nisadóꞌ roꞌ ni nacahui.
Tata Diuxi, lii rápaluꞌ binni ne maniꞌ.
7 ¡Aque sicarú nga guendaranaxhii xtiluꞌ xa, Diuxi!
¡Xaꞌnaꞌ xhiaaluꞌ nga ruyubi binni guilá!
8 Dede ridxá tipa ndaanicabe
ne guiráꞌ guendaró ni nuu ndaaniꞌ lídxiluꞌ;
lii rugueꞌluꞌ laacabe xnisa ti guiiguꞌ nanixe,
9 ra nuuluꞌ cadá guendanabani,
ne lu biaaniꞌ xtiuꞌ randa ridúꞌyadu biaaniꞌ.
10 Bidii guendaranaxhii xtiuꞌ ne guendaruni jneza xtiuꞌ
ca ni runibiáꞌ lii,
ca binni nachaꞌhuiꞌ.
11 Cadi gudiiu naa guxhateñee ca binni nayá ca naa,
ne cadi cuexieeque ca binni nadxabaꞌ ca naa.
12 ¡Laguuyaꞌ ra cayaba ca ni qué guiquiiñeꞌca!
¡Cayabacaꞌ ne maꞌ qué ziuu dxi guiásaca!