Ndaayaꞌ rinabanécabe Tata Diuxi gacané laacabe
Guendaruundaꞌ diidxaguieꞌ bicaa David.
35
Tata Diuxi, bichelaniꞌdiꞌ ca ni cuchelaniꞌdiꞌ naa;bidxiilú ca ni cucaalú naa.
2 Gucuaa xobaa xtiluꞌ ne gudáꞌ gacaneluꞌ naa;
3 gucuaa yagaguíb xtiluꞌ ne bidxiilú ca ni ladxi naa;
¡gudxi naa lii nga gulaluꞌ naa!
4 Guxooñeꞌ xtuí
ca ni racalaꞌdxiꞌ guuti naa;
guxooñeꞌ xtuí
ca ni racalaꞌdxiꞌ guniná naa;
5 ¡gúcacabe casi guixi ni riné bi,
ca ni biree nanda xiiñiꞌ guibáꞌ xtiꞌ Tata Diuxi!
6 ¡Bisucahui xnézacabe, biꞌniꞌ ni nachuuchi,
guizabinanda ti xiiñiꞌ guibáꞌ xtiꞌ Tata Diuxi laacabe!
7 Quepeꞌ ñuneꞌ laacabe gastiꞌ gucaláꞌdxicabe ñuninácabe naa;
quepeꞌ ñuneꞌ laacabe gastiꞌ gudaañecabe ti guiruyú
ra nusábacabe naa.
8 ¡Guiaba guendananá luguiácabe!
¡Guiábacabe laca lu xaléꞌ xtícabe!
¡Gácacabe nazíꞌ!
9 Ora que ziecheniáꞌ Tata Diuxi,
nannaꞌ dxandíꞌ peꞌ laabe nga bilabe naa.
10 Guidubi ladxiduáꞌ zaniéꞌ:
«Ñee nuu ruꞌ stobi casi lii la? Tata Diuxi,
Lii rulaluꞌ ca ni nazíꞌ xquendanabani,
lu náꞌ ca ni jma nadipaꞌ,
cani runiná laacabe.»
11 Riasa stale binni nadxabaꞌ ruzuhuaa lu xtiidxaꞌ,
ne rinaba diidxacabe naa xiixa ni qué gannaꞌ.
12 Riguíxecabe guendanachaꞌhuiꞌ xtinneꞌ ne guendanadxabaꞌ,
nabé riguunduꞌ ladxiduáꞌ;
13 tí dxi gucahuarácabe,
guyuaaꞌ xizaa runi laacabe,
gucuaꞌ lari raayaꞌ ne qué ñahuaꞌ,
ne ndaaniꞌ ladxiduáꞌ biindaꞌ ndaayaꞌ xtícabe.
14 Guzayaꞌ naguunduꞌ ne bisabaꞌ iqueꞌ,
ruluíꞌ peꞌ guti jñaaꞌ,
ruluíꞌ peꞌ guti xhamiguaꞌ o casi ñaca guti bicheꞌ ni guleniáꞌ.
15 Ja, yanna dxi naa biabaꞌ la?
gúcacabe tobi si, bixídxicabe naa;
casi ñácacabe binni gadxé ne ni qué runebiaꞌyaꞌ,
bininácabe naa.
16 Bitinaticabe naa,
bixídxicabe naa,
biiyatuxhucabe naa.
17 Tata Diuxi, padxí ti ndiꞌ nga guianadxiuꞌ de guyadxiluꞌ guiráꞌ ndiꞌ.
¡Bilá guendanabani xtinneꞌ, tobi lucha ni,
lu ruaa ca beedxeꞌ ca ni cabidxiaa ca!
18 Zudieeꞌ xquixe peꞌ lii neza lú guiráꞌ xpínniluꞌ;
¡ne zusisaca lii stale neza lú guiráꞌ xixécabe!
19 Cadi guxidxi ca ni nanalaꞌdxiꞌ naa de naa;
ne cadi quiñelagasaacaꞌ, ca ni nanalaꞌdxiꞌ naa sin gastiꞌ ñuneꞌ laaca.
20 Laacabe qué ruyúbicabe guibanidxícabe,
ndaaniꞌ íquecabe maꞌ cuzáꞌcabe diidxaꞌ dxabaꞌ,
ni guninanécabe binni nuu dxí ndaaniꞌ guidxi;
21 dede rieleꞌ ndaga ruaacaꞌ caniꞌcaꞌ naa, nacaꞌ:
«¡Laguuyaꞌ xinga cadúꞌyanu!»
22 ¡Lii ca nannuꞌ, Tata Diuxi!
¡Cadi guidaaguꞌ ruaaluꞌ!
¡Cadi guixaluꞌ de naa!
23 Tata Diuxi ni bizáꞌ naa, biasa, ¡bibani!
Biꞌniꞌ ni jneza ne naa, gucané naa.
24 Tata Diuxi ni bizáꞌ naa, bixhubadonda naa,
lu xtiidxaluꞌ.
¡Tí cadi guxídxicabe naa!
25 Cadi nácabe, cadi guiníꞌ íquecabe:
«¡Ndiꞌ nga ni racaláꞌdxidu!
¡Gusaanadu laabe lu gubidxa!»
26 Bisutuí lú
ca ni racalaꞌdxiꞌ guꞌyaꞌ naa zayarendaꞌ;
bisutuí lú
ca ni ná jma nadípacaꞌ que naa.
27 Huaxa guiecheꞌ ca binni ne gucaacaꞌ ridxi nayecheꞌ
ca ni racalaꞌdxiꞌ guꞌyaꞌ naa quixhedxiéꞌ laacabe guidxilayú;
ne gatigá guiníꞌcabe:
«¡Aque nandxóꞌ nga Tata Diuxi,
tí riuuláꞌdxiꞌbe gúꞌyabe chuꞌ ca binni ni runi xhiiñabe nazaaca!»
28 Ne ruaaꞌ diꞌ zaniéꞌ lii nga ruꞌnuꞌ jneza;
¡guidubi dxi zusisacaꞌ lii!