Guendaruunda ne guendarudii xquixe Tata Diuxi
33
Binni nacháꞌhuicaꞌ, la cuidxi Tata Diuxi;sicarú nga riree diidxaꞌ ruaa binni nayá ladxidóꞌ.
2 Lagudii xquixe peꞌ Tata Diuxi ne saa xtiꞌ arpa,
laguundaꞌ xtiidxaꞌ Tata Diuxi ne saa xtiꞌ salteriu,
3 laguundaꞌ ti saa cubi guicaabe,
¡laguxhidxi sicarú ora cuídxitu laabe!
4 Dxandíꞌ ca xtiidxaꞌ Tata Diuxi;
ne guiráꞌ ni bíꞌnibe culuíꞌ qué rucheebe.
5 Nadxii Tata Diuxi ni dxandíꞌ ne ni jneza;
¡xquendaranaxhiibe ruchatipani guidubi guidxilayú!
6 Ne xtiidxaꞌ Tata Diuxi guyáꞌ guibáꞌ,
ne xhieꞌ ruaabe, guyáꞌ guiráꞌ bele cá guibáꞌ.
7 Laabe rutópabe ne rucaa daahuibe xnisa nisadóꞌ.
8 Laguisaca Tata Diuxi ndaaniꞌ guidxilayú riꞌ;
¡guiráꞌ xixé binni guidxilayú, lagusisaca laabe!
9 Laabe guniꞌbe, ne guca guirani;
laabe bidiibe diidxaꞌ, ne guirani bizuhuaa dxiichiꞌ.
10 Tata Diuxi rúnibe xcaaniꞌ
ca dxiiñaꞌ xtiꞌ ca binni qué rulabi laabe,
11 huaxa ca xhiiñaꞌ Tata Diuxi
zuhuaa dxiichicani ne qué zanda guibiácani.
12 Aque nayecheꞌ guidxi ni ricaa xtiidxaꞌ Tata Diuxi,
guidxi roꞌ ni gulibe guicaabe.
13 De guibáꞌ ruuyaꞌ Tata Diuxi guiráꞌ binni;
14 dede ra nabézabe
ruuyadxibe binni nabeza guidxilayú;
15 laabe bizaꞌbe ladxidoꞌcaꞌ,
ne ruuyabe guiráꞌ ni rúnicaꞌ.
16 Nin ti xaique roꞌ qué zalá neca gapa stale dxuꞌ gulá laa,
zaqueca nin ti binni nadxibalú qué zulá stipa xtiꞌ laa;
17 ca maniꞌ qué zanda gulacaꞌ guirutiꞌ;
neca nadípacame, qué zanda diꞌ gulácame guirutiꞌ.
18 Tata Diuxi, rapa ca ni rusisaca laa
ne ca ni ribeza lu xquendaranaxhiibe,
19 para gulabe laacaꞌ lu náꞌ guendaguti
ne gudiibe laaca guendanabani lu gubiñaa.
20 Laadu ricá ruaadu Tata Diuxi;
¡laabe racanebe laadu ne rápabe laadu!
21 Ladxidoꞌdo riecheneni Tata Diuxi;
tí nabé ricá ruaadu lá ndaayabe.
22 ¡Tata Diuxi, ribézadu guendaranaxhii xtiluꞌ sané laadu,
casi peꞌ ribézadu guꞌnuꞌ!