Guendaruxhubadonda ne guendarixá donda
Ni gudixhe David gacaꞌ.
32
Aque nayecheꞌ nga riuu binnidxi laa ma bixá ca xtonda ne ca guendaruchee xtiꞌ.
2 Aque nayecheꞌ nga riuu binni ni qué rucaa ique
guni guendanadxabaꞌ,
tí Tata Diuxi qué gapa paraa gudxiibaꞌ donda ique.
3 Dxi qué nibeeꞌ ruaaꞌ diidxaꞌ niniéꞌ xtondaꞌ,
ladeꞌ ziguundu
runi guiráꞌ guendariguliibi xtinneꞌ guidubi dxi,
4 dxi ne gueelaꞌ nabé guuninaluꞌ naa.
Gucaꞌ casi ti guieꞌ ni bisiguunduꞌ gusibá,
zaqué peꞌ nga bisaba iqueꞌ.
5 Naa guleeꞌ ruaaꞌ diidxaꞌ
guiráꞌ donda xtinneꞌ ne ca guendanadxabaꞌ ni bineꞌ;
ne zacá gudixheꞌ cueeruaaꞌ diidxaꞌ neza luluꞌ,
ne lii, Tata Diuxi, bixhaluꞌ cani.
6 Ngue runi ca ni nuu lu guendanagana,
ca ni qué ruche ne lii rucaacaꞌ ridxi lii,
ne neca peꞌ guiree guiiguꞌ,
qué zugaandadiꞌ ni laacabe.
7 Lii nga rucaachiluꞌ naa;
ne rulaluꞌ naa lu guendanaxoo,
ne ridxi xtiluꞌ riguu leꞌ naa tí ganda guilaꞌyaꞌ.
8 Ná Tata Diuxi:
«Nabé ruuyadxiéꞌ lii.
Naa zusiideꞌ lii,
ne zulidxeꞌ lii,
ne zuluéꞌ lii xi neza saluꞌ.
9 Cadi gácaluꞌ casi ndxacu, cadi gácaluꞌ casi maniꞌ,
ca ni qué ruzuubaꞌ diidxaꞌ;
naquiiñeꞌ chuꞌ doo ruaacaꞌ ti guidoꞌcaꞌ,
ne pa qué chuꞌ doo ruaacaꞌ,
qué zúnacaꞌ ne qué zadxíñacaꞌ ra nuuluꞌ.»
10 Ca binni nadxabaꞌ zápacaꞌ stale yuubaꞌ,
huaxa xquendaranaxhii Tata Diuxi
riguiidxini ca ni ricaa xtiidxabe.
11 Guiráꞌ xixé binni nachaꞌhuiꞌ
ne nayá ladxidóꞌ laguiechené Tata Diuxi,
¡laguiecheꞌ ne laguguaꞌ ridxi nayecheꞌ!