Guendaruunda ne guendarudii xquixe Tata Diuxi
Guendaruundaꞌ guicaa Diuxi ra yuꞌduꞌ. Guendaruundaꞌ diidxaguieꞌ bicaa David.
30
Naa rusisacaꞌ lii, Tata Diuxi,lii bilaluꞌ naa,
ne qué nusaanuꞌ
nuxidxi ca ni nanalaꞌdxiꞌ naa.
2 Tata Diuxi ni bizáꞌ naa,
gunabaꞌ lii gacaneluꞌ naa, ne bisiandaluꞌ naa;
3 Tata Diuxi, lii bilaluꞌ naa lu guendaguti;
bidiiluꞌ naa guendanabani, ne bilaluꞌ naa tí qué ñateꞌ.
4 Laatu, ca ni ricaa xtiidxaꞌ Tata Diuxi, ¡laguundaꞌ saa xtibe!,
¡lagusisaca lá ndxoꞌbe!
5 Guendaridxiichi xtibe qué rindaani xadxi,
ne guendanachaꞌhuiꞌ xtibe qué riluxe.
Pa guidúꞌnanu huaxhinni la?
siadóꞌ guieꞌ ma nayecheꞌ nuunú.
6 Yanna huaxa ma zuhuaa dxiicheꞌ, naa rabeꞌ:
«Guirutiꞌ zusaba naa.»
7 Lii Tata Diuxi, lu guendanachaꞌhuiꞌ xtiluꞌ
bizuhuadxiichiluꞌ naa casi ti dani,
casi peꞌ lii bisaanaluꞌ de gacaneluꞌ naa
bidxibeꞌ ne birenda xquendabiaaneꞌ.
8 Tata Diuxi, neza luluꞌ nga ruunaꞌ;
ne lii nga rucaa ridxi:
9 «Xii ndiꞌ guiree ndu pa naa gateꞌ,
ne chaa ndaaniꞌ baꞌ.
¡Yu dé qué zanda gusisaca lii,
ne qué zanda guzeeteni diidxaꞌ dxandíꞌ xtiluꞌ!
10 Tata Diuxi bicaadiaga naa ne biáꞌ naa;
Tata Diuxi, ¡gucané naa!»
11 Maꞌ guxhaluꞌ ca lari yaaseꞌ ni nacuáꞌ;
ne maꞌ bigaculuꞌ naa lari nayecheꞌ xtiꞌ saa,
ne ca guendaruunaꞌ xtinneꞌ ma bisiecheluꞌ laa.
12 Ngue runi, Tata Diuxi,
qué zadaagudiꞌ ruaaꞌ de gusisacaꞌ lii;
¡ne zuundaꞌ saa nayecheꞌ
ra gudieeꞌ xquixepeꞌ lii!