Ridxi nandxóꞌ xtiꞌ Tata Diuxi
Guendaruundaꞌ diidxaguieꞌ bicaa David.
29
Xiiñiꞌ guibáꞌ ni nuu guibáꞌ, lagusisaca Tata Diuxi;lagusisaca stipa ne guendanandxóꞌ xtibe,
2 lagusisaca lá nandxóꞌ xtiꞌ Tata Diuxi,
lagusisaca laabe ndaaniꞌ yuꞌduꞌ sicarú xtibe.
3 Xtidxi Tata Diuxi rixidxilaa lu nisadóꞌ;
Diuxi nandxóꞌ nga rucaa ridxi ca;
¡laabe nuube lu nisadóꞌ roꞌ!
4 Ridxi xtiꞌ Tata Diuxi, rixidxini nadipaꞌ;
ridxi xtiꞌ Tata Diuxi ruchibi ra xhidxi laa;
5 ridxi xtiꞌ Tata Diuxi richézani ca yaga cedru.
¡Tata Diuxi richeza ca cedru ni nuu Líbano!
6 Runiibi dxáchabe ca dani Líbano ne Sirión;
¡laabe rúnibe guichésacani casi richesa yuze huiiniꞌ ne yuze roꞌ!
7 Ridxi xtiꞌ Tata Diuxi dede rundaa bele;
8 ridxi xtibe runibidxacha ca layú bidxi;
¡Tata Diuxi runibidxacha layú bidxi xtiꞌ Cadés!
9 Ridxi xtiꞌ Tata Diuxi runibidxacha guiráꞌ yaga,
ne raxhani guiráꞌ xixé yaga xtiꞌ ca guiꞌxhiꞌ.
Guiráꞌ tu rusisaca laabe, ndaaniꞌ yuꞌduꞌ xtibe.
10 Tata Diuxi nga xpixuaanaꞌ nisaguié;
¡raca ni ná Tata Diuxi casi raca ni ná ti xaique roꞌ!
11 Tata Diuxi rudii stipa ca xpinni;
riguube ndaayaꞌ laaca ne riguixhedxibe ladxidoꞌcaꞌ.