Tata Diuxi rucaadiaga laanu
Guendaruundaꞌ diidxaguieꞌ bicaa David.
28
Tata Diuxi, ni rapa naa,lii nga rucaa ridxi.
¡Qué chi gusaanuꞌ de guicabiluꞌ naa!
Pa lii gutaagudiagaluꞌ la?
maꞌ zanda gucaa laꞌyaꞌ lade ca gueꞌtuꞌ.
2 Bicaadiaga ca ridxi xtinneꞌ ra canabaꞌ lii gacaneuꞌ naa,
ora ma cusugaanayáꞌ neza ra nuu yuꞌduꞌ nandxóꞌ xtiluꞌ.
3 Cadi cuꞌluꞌ naa lu neza xtiꞌ ca ni nadxabaꞌ,
cadi guninaluꞌ naa casi chi guninaluꞌ ca ni qué guiquiiñeꞌ,
laacabe nachaꞌhuiꞌ lúcabe
peru ladxidóꞌcabe nadxabaꞌ.
4 Bisabanáꞌ laacabe,
biaꞌ ca donda ni ma bíꞌnicabe;
casica rúnicabe zacaca gácacabe,
biaꞌ ca donda ni huayúnicabe.
5 Laacabe cadi cusisácacabe
guiráꞌ ni biꞌniꞌ Tata Diuxi,
¡gusaba Tata Diuxi laacabe,
ne qué chuꞌruꞌ dxi guindisaꞌ laacabe!
6 ¡Riguaaꞌ ndaayaꞌ Tata Diuxi,
tí laa bicaadiaga naa!
7 Nandxóꞌ Tata Diuxi laa rapa naa;
gucualuáꞌ xtiidxabe, ne gucanebe naa.
Nabé nayecheꞌ nuu ladxiduáꞌ;
zuundaꞌ ne zudieeꞌ xquixe peꞌ laabe.
8 Tata Diuxi naca stipa xtiꞌ ca xpinni;
racanebe ne rápabe xaique roꞌ xtibe ni gulibe.
9 Tata Diuxi, bilá ca xpínniluꞌ;
ne guluu ndaayaꞌ laacabe.
Gupa laacabe casi rapa binni ca dendxuꞌ huiiniꞌ xtiꞌ;
¡Guluu laacabe ndaaniꞌ nouꞌ qué chuꞌ dxi gundaaluꞌ laacabe!