Tata Diuxi naca biaaniꞌ xtinneꞌ ne laabe rulabe naa
Guendaruundaꞌ diidxaguieꞌ bicaa David.
27
Tata Diuxi naca biaaniꞌ xtinneꞌ ne laabe rulabe naa,tu laa ndiꞌ guchibi naa.
Tata Diuxi rulá guendanabani xtinneꞌ,
tu laa ndiꞌ guchibi naa.
2 Ca ni nadxabaꞌ ne ca ni nanalaꞌdxiꞌ naa la?
racacaꞌ tobi si rucaalucaꞌ naa, nuucaꞌ gunidecaꞌ naa;
laca laacaꞌ rirenda ñeecaꞌ ne riábacaꞌ.
3 Neca peꞌ cuizisi dxuꞌ naa,
ladxiduáꞌ qué zadxibi diꞌ;
neca peꞌ gacaláꞌdxicaꞌ gucaalú ca naa,
qué zadxibe diaꞌ.
4 Ti diidxaꞌ si huanaba Tata Diuxi,
ti diidxaꞌ ni nuu ndaaniꞌ ladxiduáꞌ:
chuaaꞌ ndaaniꞌ yuꞌduꞌ xtibe
tí ganaxhieeꞌ laabe
guiráꞌ dxi lu xquendanabaneꞌ,
ne guuyaꞌ pabiáꞌ sicarube.
5 Dxi guidxiña dxi, guedandá ca dxi nagana la?
laabe zuguube naa ndaaniꞌ xhiúꞌdube;
ne zápabe naa xaꞌnaꞌ xpandabe.
¡Ne zudxiibabe naa lu ti guie roꞌ!
6 Ora ca zanda guindisaꞌ iqueꞌ
luguiáꞌ ca ni nanalaꞌdxiꞌ naa;
ora ca zanda gudieeꞌ ti gunaa ndaandiꞌ yuꞌduꞌ xtiuꞌ,
ne zucaaꞌ ridxi yecheꞌ, ne zuundaꞌ saa ra gusisacaꞌ laabe.
7 Tata Diuxi, lii nga rucaariꞌdxeꞌ, bicaadiaga naa.
Biáꞌ naa, ¡bicabi naa!
8 Ladxiduáꞌ rabi naa:
«Biyubi Tata Diuxi.»
Yanna la? maꞌ cuyubeꞌ lii.
9 ¡Cadi gucachiluluꞌ de naa!
¡Cadi gudxiguetuꞌ naa ne xiana!
¡Tobi lucha stipa xtinneꞌ nga lii!
Qué chi gusaanuꞌ naa stubeꞌ,
qué gapaꞌ tu guꞌyaꞌ naa,
lii nga Diuxi xtinneꞌ ni zanda gulá naa.
10 Tata Diuxi, neca jñaaꞌ ne bixhozeꞌ gusaana naa,
lii zapaluꞌ naa.
11 Tata Diuxi, runi ca ni nanalaꞌdxiꞌ naa;
biluíꞌ naa neza xtiluꞌ,
yené naa lu ti neza nachaꞌhuiꞌ;
12 qué chi gusaanuꞌ naa lu náꞌ ca ni nanalaꞌdxiꞌ naa,
cadi dxandíꞌ diꞌ,
guiráꞌ ca donda ni cudxiibacabe iqueꞌ.
13 Nannadxiꞌcheꞌ zuuyaꞌ
guendanachaꞌhuiꞌ xtiꞌ Tata Diuxi
lu guidubi guendanabani diꞌ.
14 ¡Qué chi guidxagaluꞌ de cuezuꞌ Tata Diuxi!
¡Cadi guidxíbiluꞌ!
¡Gucuaa xtiidxabe, dxandíꞌ cani!