Xaique roꞌ xtiꞌ guendanandxóꞌ
Guendaruundaꞌ diidxaguieꞌ bicaa David.
24
Tata Diuxi nga xpixuaanaꞌ guidubi guidxilayú,ne xtibe nga guiráꞌ ni nuu ndaanini,
ne xtibe nga tu guiráꞌ nabeza ndaanini.
2 Tata Diuxi nga bizuhuaa dxiichiꞌ ñee guidxilayú,
ne biquídxibe ni lu nisadóꞌ ne lu guiiguꞌ.
3 Tu laa ndiꞌ quibaꞌ lu dani xtiꞌ Tata Diuxi yaꞌ.
Tu laa ndiꞌ guiaana ndaaniꞌ yuꞌduꞌ nandxóꞌ xtibe yaꞌ.
4 Ca ni nayá náꞌ ne ladxidóꞌ,
ca ni qué huacheené laabe,
ca ni qué rusisacaꞌ bidóꞌ,
ne qué rusiguii.
5 Tata Diuxi, Diuxi xtibe ne ni rulá laabe,
zuguu ndaayaꞌ laabe ne zuni jneza luguiabe.
6 Zacá nga riquiiñe sáꞌ ca ni ruyubi Tata Diuxi,
ca ni ruyubi Diuxi xtiꞌ Jacob.
7 ¡Laguixaleꞌ ndagayoocaꞌ ca ni qué ziuu dxi guiaabiꞌ!
¡Laguixalendaga,
tí ganda guiuu Xaique roꞌ ni risaca!
8 Tu nga naca Xaique roꞌ ni risaca ca yaꞌ.
¡Laabe nga Tata Diuxi, ni jma nadipaꞌ ne nadxibalú!
¡Laabe nga Tata Diuxi, nadxibalú ni rucaalú ra cadíndecabe!
9 ¡Laguixaleꞌ ndagayoocaꞌ ca ni qué ziuu dxi guiaabiꞌ!
¡Laguixalendaga,
tí ganda guiuu Xaique roꞌ ni risaca!
10 Tu nga naca Xaique roꞌ ni risaca ca yaꞌ.
¡Laabe nga Tata Diuxi ni jma nandxóꞌ!
¡Laabe nga Xaique roꞌ ni risaca!