Ti guendariuundaꞌ ra canábacabe Diuxi gacané laacabe
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David.
21
Tata Diuxi, xaique roꞌ ni guliluꞌ que la? nayecheꞌ nuube tí ma bidiiluꞌ laabe stale stipa;¡ne nabé nayecheꞌ nuube tí ma stale nga ra bidxiibabe láluꞌ!
2 Ma bidiiluꞌ laabe guiráꞌ ni racaláꞌdxibe;
ne qué huasiaadxaluꞌ gastiꞌ de ni huanábabe lii.
3 Gucoouꞌ laabe ne stale ndaayaꞌ,
ne bidxiibuꞌ ti laꞌpaꞌ oro íquebe.
4 Gunábabe lii guendanabani, bidiiluꞌ ni laabe:
ti guendanabani ni guindaa ni qué zaluxe.
5 Tí bidiiluꞌ laabe stale ndaayaꞌ,
ngue runi nabé naroꞌbaꞌ xtípabe;
ne biꞌnuꞌ laabe nandxóꞌ ne bisisácaluꞌ laabe.
6 Ndaayaꞌ ni gucuaabe que la? qué ziuu dxi guiluxe;
gúꞌyaꞌsibe lii ridxá ladxidoꞌbe ne stale guendanayecheꞌ.
7 Xaique roꞌ xtiꞌ Diuxi, qué ziuu dxi guiabalú,
tí lii nannadxíchilu xi nabe;
¡nannadxíchiluꞌ nadxiibe lii!
8 Stipaꞌ roꞌ xtiluꞌ cá zugaandani ca ni nanalaꞌdxiꞌ lii;
náꞌ ndígaluꞌ zugaandani ca ni qué racalaꞌdxiꞌ lii;
9 dxi guidxiña dxi gueeduꞌ guxhuba dondaluꞌ,
zusaꞌbuꞌ laacabe ndaaniꞌ ti suquii ndaꞌ.
Ne stale xiana nga gusaba Tata Diuxi laacabe ndaaniꞌ bele
ni guxuuxe laacabe, pa laacabe guchiichicabe laa.
10 Zabeeuꞌ xiiñicabe ne ca ni za de laacabe lade binni,
ndaaniꞌ guidxilayú riꞌ.
11 Neca peꞌ gacaláꞌdxicabe guninácabe lii
ne gacaláꞌdxicabe gúnicabe xiixa,
huaxa qué zanda diꞌ gúnicabe ni,
12 lii zusixooñeluꞌ laacabe;
ra guzaabiluꞌ bazandíꞌ xtiuꞌ lúcabe.
13 ¡Biasané stipa roꞌ xtiluꞌ, Tata Diuxi!
¡Tí ne ti saa roꞌ ne stale guendanayecheꞌ gucaꞌduꞌ ridxi ca guendanandxóꞌ ni bíꞌniluꞌ!