Rihuini guiráꞌ guendanandxóꞌ ndaaniꞌ guidxilayú
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David.
19
Guibáꞌ ruzeeteꞌ guendanandxóꞌ xtiꞌ Diuxi;ne xaibáꞌ, rabi laanu ni biꞌniꞌ Diuxi.
2 Dxi ne dxi riníꞌ saacani;
ne ca gueelaꞌ rucheeche ca diidxaꞌ ca.
3 Neca qué runadiáganu xtiidxacani,
ne nin xtídxicani,
4 xtiidxabe ridxiña lu guidubi guidxilayú,
dede ra jma nagaꞌchiꞌ.
Ne raqué bicaa Diuxi gubidxa,
5 ne gubidxa ribee lú casi ti nguiiu ni deruꞌ bichaganáꞌ,
ne riéchebe casi ti baꞌdunguiiu ra ziguxooñe.
6 Gubidxa rindani ti neza,
ne rudii bieque, ti chiguiaazi sti neza,
ne guirutiꞌ rilá lu guendanandáꞌ xtiꞌ.
7 Ca guendarusiidiꞌ xtiꞌ Tata Diuxi jneza cani,
rudiicani guendanabani nacubi.
Tobi si nga xtiidxaꞌ Tata Diuxi,
rusiaanini xpiaaniꞌ binni nadóꞌ.
8 Ca xtiidxaꞌ Tata Diuxi jneza cani,
redanécani guendanayecheꞌ ndaaniꞌ ladxidóꞌ binni.
Ca xtiidxaꞌ Tata Diuxi nayá cani,
ne riguucani biaaniꞌ ndaaniꞌ guie lú binni.
9 Guendaridxibi xtiꞌ Tata Diuxi nayá ni,
ne qué riluxe ni.
Ca xtiidxaꞌ Tata Diuxi, dxandíꞌ cani,
guirácani jneza cani,
10 ¡jma risacacani que oro chaꞌhuiꞌ!,
¡ne jma nanaxhicani que dxiñayaga!
11 Ca diidxaꞌ riꞌ, rusiénecani ni runi xhiiñaluꞌ riꞌ,
ne zareeni laa jneza pa zinanda cani.
12 Nuu xa tu nanna pa ruchee,
¡Tata Diuxi bitidilaꞌdxiꞌ naa,
ne bixhá ca donda nagaꞌchiꞌ xtinneꞌ!
13 Biiyaꞌ naa qué guchayaꞌ bi yanneꞌ;
qué gusaanuꞌ gacaꞌ nayáꞌ.
Tí gacaꞌ ti nguiiu nayá ladxidóꞌ,
ne qué zapaꞌ ra quiñeyúcabe naa;
ne zacá guixá xtondaꞌ.
14 Gucuaa ca xtiidxaꞌ
ne ca ni cá lu xquendabiaaneꞌ,
Ay Tata Diuxi, lii nga rulaluꞌ
ne rápaluꞌ naa.