Ti guendariuundaꞌ ra gudixhedxibe ca ni nanalaꞌdxiꞌ laabe
Ni gudixhe xaique xtiꞌ ca binni ruundaꞌ. Xtiꞌ David, ni biꞌniꞌ xhiiñaꞌ Tata Diuxi, ra biꞌndaꞌ saa diꞌ dxi bilá Tata Diuxi laa tí cadi ñaba lu náꞌ Saúl ne guiráꞌ ca ni nanalaꞌdxiꞌ laa. Sica riꞌ guniꞌbe:
18
Tata Diuxi, lii nga stipa xtinneꞌ;¡naa nadxieeꞌ lii!
2 Lii nga rápaluꞌ naa,
lii nga yoo ra rucacheluáꞌ,
lii nga rulaluꞌ naa,
Diuxi xtinneꞌ,
guie roꞌ ni rulá naa,
lii nga nacuꞌ ti xiixa ni rulá naa,
stipa ni rulá naa,
lii nga yoo ni jma nandxóꞌ ra rucacheluáꞌ.
3 Tata Diuxi, lii nga naquiiñeꞌ gusisácacabe;
ora guinieniáꞌ lii, rulaluꞌ naa de ca ni nanalaꞌdxiꞌ naa.
4 Guendaguti bichenda naa lade xtoo;
bidxibeꞌ, bixuíꞌ luáꞌ zuhuaa lu ti nisa roꞌ naxoo.
5 Guendaguti bichenda naa lade xtoo;
¡biabaꞌ lu ti xaléꞌ roꞌ!
6 Lu xizaa xtinneꞌ que bicaa ridxi Tata Diuxi,
gunabaꞌ Diuxi xtinneꞌ gacané naa,
¡ca ridxi xtinneꞌ gabe laa!
7 Guca ti xu roꞌ guidxilayú;
biniibidxacha ca dani dede xcuca;
xiana xtiꞌ Tata Diuxi biniibicani.
8 Ndaaniꞌ xii biree guꞌxhuꞌ,
ne ndaaniꞌ ruaa biree bele ni runidé;
¡neza ruaabe cundaabe buu ca guí!
9 Bixhelebe guibáꞌ ne bietebe.
¡Xañeebe nuu stale za cahui naroꞌbaꞌ!
10 Gudxiꞌbabe deche ti xiiñiꞌ guibáꞌ ca xhiaa,
ne bipapabe lade bi.
11 Gucuaabe yegucachilube,
sica ñaca ti yoo lari,
lade ca za cahui nuaꞌ nisaguié nutaaguꞌ laabe que.
12 Ti xtuxhu sica gui guibáꞌ biree ra nuube;
lu ca za cahui bireeche ca guie gui ne buu ca gui.
13 Tata Diuxi ni nandxóꞌ bicaa ti ridxi guiibaꞌ dede guibáꞌ;
bireeche guie gui ne buu ca gui.
14 Bilaabe ca xtuxhube sica ñácani ti bazandíꞌ,
bisiayabe ca ni nanalaꞌdxiꞌ naa bisixhooñebe laacaꞌ.
15 Ridxi roꞌ xtiꞌ Tata Diuxi que,
bisihuínini xaguete nisadóꞌ
ne bihuini ra zuba guidxilayú
runi bi naroꞌbaꞌ bindaa ruaabe que.
16 Diuxi bisigaa náꞌ dede ra nasoo,
ne nabe guleebe naa ndaaniꞌ nisadóꞌ roꞌ que.
17 Laabe bilabe naa de lu náꞌ ca binni ni nanalaꞌdxiꞌ naa
tí jma nadípacaꞌ que naa.
18 Bicaalúcabe naa dxi peꞌ jma nuaaꞌ ra nagana,
xisi Tata Diuxi gucané naa;
19 laabe bilabe naa;
¡tí nabé nadxiibe naa!
20 Tata Diuxi maꞌ bidii naa ti xindxaa sicarú
tí bineꞌ ni jneza,
21 naa huayenandaꞌ lu xneza Diuxi;
¡ne qué huayuu diꞌ dxi gudxieeꞌ decheꞌ laabe!
22 Qué zusiaandaꞌ diaꞌ ca xtiidxabe;
¡qué ziuu dxi gusiaandaꞌ ca diidxaꞌ biaꞌ xtibe!
23 Nayaguiéꞌ ladxiduáꞌ neza lube;
naa biduubaꞌ lu guendanadxabaꞌ.
24 Tata Diuxi ma bidii naa ti xindxaa
tí huayune ni jneza neza lú.
25 Tata Diuxi, lii racaneuꞌ ca ni nacanecaꞌ lii tobi si,
qué rucaanaluꞌ ca ni qué rucaanaꞌ lii,
26 ne qué riguiñeyuluꞌ ca ni qué gapa ra guidiñeyú,
ne jma nexhenaluꞌ que ca ni racalaꞌdxiꞌ gataná.
27 Lii rulaluꞌ ca ni nazíꞌ xquendanabani,
ne ruxhatañeeluꞌ ca ni ruchá bi yanni.
28 Tata Diuxi, lii rudiiluꞌ naa biaaniꞌ;
ne ruzaaniluꞌ gueelaꞌ cahui xtinneꞌ.
29 Ne stipa xtiluꞌ zucaaluaꞌ ca ni nanalaꞌdxiꞌ naa,
ne zachesaꞌ lu lindaa xtiꞌ xquídxicaꞌ.
30 Nabé sicarú lu neza xtiꞌ Diuxi;
ca diidxaꞌ ni rudii Diuxi,
nayácani ne dxandícani;
¡Diuxi rulá ca ni ruzuubaꞌ xtiidxaꞌ!
31 Ñee cadi Diuxi, nga Tata Diuxi la?
Ñee nuuruꞌ xti Diuxi ni zanda gulá laanu la?
32 Diuxi nga rudii naa stipa,
ne cayapa naa tí qué gucheeꞌ,
33 tí laabe bíꞌnibe ñeeꞌ nagueenda sica ñee bidxiñaꞌ,
ne bizuhuaa dxiichibe naa ra jma nasoo.
34 Laabe rusiidibe naa tindeꞌ,
ne rudiibe naa stipa tí ganda gusutipaꞌ ca baza guiibaꞌ.
35 Lii rápaluꞌ ne rulaluꞌ naa,
ne náꞌ ndígaluꞌ nga ruzuhuaa chaahuiluꞌ naa;
guendanachaꞌhuiꞌ xtiluꞌ rusisaca naa.
36 Binichaahuiluꞌ neza xtinneꞌ,
ne qué huayuu dxi guiree chuchi ñeeꞌ.
37 Guzayananda ca ni nanalaꞌdxiꞌ naa ne bigaanda laacaꞌ,
pa que ñunedeꞌyaꞌ laacabe, qué nibiguetadiaꞌ.
38 Bixuuxeꞌ laacabe ma qué ñasarucabe.
¡Xañeeꞌ nga biabacabe!
39 Bidiiluꞌ stipa naa tí ganda gudxieeluáꞌ;
ne bicaaluꞌ ca ni qué ruzuubaꞌ xtiidxaluꞌ guzuxibicaꞌ xañeeꞌ,
40 biiyadxiꞌcheꞌ piaꞌ nga bixooñecabe.
Ne zacá gunda bisixooñéꞌ ca ni nanalaꞌdxiꞌ naa.
41 Gunábacabe ñacané tuuxa laacabe,
guirutiꞌ qué niná;
bicaacabe ridxi Tata Diuxi, qué nicabi laacabe.
42 ¡Binedeꞌyaꞌ laacabe casi yu dé ni rusaꞌbi bi!
¡Bixhatañeeꞌ laacabe, casi ruxhatañeecabe beñe ni nexhe ndaaniꞌ neza!
43 Bilaluꞌ naa de ndaaniꞌ xquidxi ca binni qué ruzuubaꞌ xtiidxaluꞌ,
ne biꞌnuꞌ naa xaique roꞌ xtiꞌ ca guidxi roꞌ,
ne yanna ma stale binni qué runebiaꞌyaꞌ rúnicaꞌ ni rabeꞌ.
44 Casi peꞌ gucaaꞌ ridxi, ruzuubacaꞌ xtiidxaꞌ;
ne binni gadxé guidxi rúnicaꞌ naa nandxóꞌ,
45 guiráꞌ binni gadxé guidxi ridxíbicaꞌ
ne racadíticaꞌ rireecaꞌ de ra nucachilucaꞌ.
46 ¡Guibani Tata Diuxi!
¡Nandaayaꞌ gacaꞌ ni rapa naa!
¡Guisaca Diuxi ni bilá naa!
47 Laabe nga Diuxi ni ruquixeni ca ni runiná naa
ne laabe nga rucaabe ca guidxi guzuubacaꞌ xtiidxaꞌ.
48 Laabe rulabe naa lu náꞌ ca ni nanalaꞌdxiꞌ naa,
ne lu náꞌ ca ni qué ruzuubaꞌ xtiidxabe ca ni bicaalú naa.
¡Tata Diuxi, lii nga rulaluꞌ naa lu náꞌ ca binni qué guiquiiñe ca!
49 Ngue runi rusisacaꞌ lii lade guiráꞌ ca guidxi
ne ruundaꞌ stale saa nayecheꞌ ra riete láluꞌ.
50 Rudiiluꞌ stale stipa xaique roꞌ ni guliluꞌ;
nabé stale guendaranaxhii nga rudiiluꞌ David ne ca lisaa xtiꞌ.