Ndaayaꞌ ni ruundaꞌ binni ra canabaꞌ gulábicabe laa
Diidxaꞌ ndaayaꞌ xtiꞌ David.
17
Tata Diuxi, bicaadiaga diidxaꞌ jneza canabaꞌ lii,bilabi naa cucaariꞌdxeꞌ lii,
bicaadiaga ndaayaꞌ xtinneꞌ,
cadi binni rusiguii nga caniꞌne lii.
2 ¡Gudixhebiáꞌ naa,
lii piouꞌ nga nannu ni jneza!
3 Lii riuuluꞌ lu xquendabiaaneꞌ;
ne rápaluꞌ naa huaxhinni;
huaguubiaꞌluꞌ naa,
ne qué huadxeꞌluꞌ ni nadxabaꞌ ndaaniꞌ ladxiduáꞌ.
Ne qué huaniéꞌ diidxaꞌdxabaꞌ,
4 casi riníꞌ xcaadxi ca;
maꞌ bixaleꞌ lu ca neza xtiꞌ guendanaxoo,
casi naluꞌ guneꞌ.
5 Huazayaꞌ dxiꞌcheꞌ lu ca neza xtiluꞌ;
qué huayuu dxi gaxhañeeꞌ lúcani.
6 Ay Diuxi, lii nga rucaa ridxi,
lii ricábiluꞌ naa;
bicaadiaga ca xtiidxaꞌ ne bilabi naa.
7 Biluíꞌ dxichi naa guendaranaxhii xtiluꞌ,
lii rulaluꞌ binni ni rizabinandacabe laa.
8 Gupa naa casi ñacaꞌ guie bizaluluꞌ;
gupa naa xaꞌnaꞌ xpandaꞌ xhiaaluꞌ,
9 bilá naa lu náꞌ ca ni cucaalú naa,
¡bilá naa lu náꞌ ca ni nanalaꞌdxiꞌ naa!
10 Ca ni ruchá bi yanni, ca ni riníꞌ xoo;
11 ne gaxha gaxha nándacaꞌ naa,
cabezasicaꞌ gusabayucaꞌ naa.
12 Ruluíꞌcaꞌ beedxeꞌ,
beedxeꞌ duxhuꞌ nexheláꞌnacaꞌ nucachilucaꞌ
cabeza xeexhecaꞌ gutaabi xhúgacaꞌ.
13 Tata Diuxi, ¡biasa ne bicaaluꞌ laacabe!
¡Bisabaxiibi laacabe!
Ne guiibaꞌ roꞌ xtiuꞌ bilá naa lu náꞌ binni nadxabaꞌ;
14 Tata Diuxi, ne guendanandxóꞌ xtiluꞌ bilá naa de laacabe;
¡gulee laacabe de lu guidxilayú riꞌ,
tí ndiꞌ nga layú biꞌniꞌ xtícabe lu guendanabani diꞌ!
Bisaana guidale xtícabe, gácacabe nandxóꞌ
tí go xhaataꞌ ca xiiñiꞌcabe de ra guirezacaꞌ,
ne guiaana ruꞌ ni go ca xhiágacabe.
15 Huaxa naa, zadxá tipa ladxiduáꞌ,
¡guuyaꞌ siaꞌ luluꞌ,
ne guibaneꞌ guuyaꞌ naa neza luluꞌ!