Gastiꞌ ruꞌ ni jma sicarú biaꞌ ni rusigaꞌdeꞌ Diuxi
Diidxaguieꞌ bicaa David.
16
¡Diuxi, gupa laꞌ naa,lii nga ca luaꞌ gulaluꞌ naa!
2 Naa maꞌ huayabeꞌ lii:
«Lii nga Tata Diuxi xtinneꞌ;
guirutiꞌ ruꞌ stobi casi lii.»
3 Ca bidóꞌ xtiꞌ guidxi ca la? nandxóꞌcaꞌ,
zacá nga riníꞌ ca ni riechene laacabe,
4 ca ni rutale ca xpidóꞌ,
ca ni riaba xibi neza lúcabe.
¡Nin qué ziuu dxi chuaaꞌ ra cuxhiicabe rini ni gusigáꞌdecabe xpidóꞌcabe!
¡Nin qué ziuu dxi guzeeteꞌ lácabe!
5 Tata Diuxi lii nga guiráꞌ xixé ni nacaꞌ;
nabé stale ndaayaꞌ rudiiu naa;
ndaaniꞌ ladxinaluꞌ nga nuu xquenabaneꞌ.
6 Nabé sicarú nga ni bidiiu naa;
¡nabé peꞌ sicarú nga ni bisigáꞌdeluꞌ naa!
7 Ruguaaꞌ stale ndaayaꞌ Tata Diuxi
tí laabe ruluiꞌbe naa neza sayaꞌ,
ne lu gueelaꞌ nga rulídxibe ni jma nagaꞌchiꞌ nuu ndaaniꞌ ladxiduáꞌ.
8 Nabé ruzuhua Tata Diuxi luáꞌ;
ne gastiꞌ ni gusaba naa pa laabe zuhuaabe neza ndigaꞌ xtinneꞌ.
9 Ngue runi ndaaniꞌ ladxiduáꞌ la?
stale guenda nayecheꞌ nuu.
Ne naa zaziiladxeꞌ sicarú, guirutiꞌ tu guchiiñaꞌ naa,
10 lii qué zusaanuꞌ naa ndaaniꞌ baꞌ,
¡qué zusaanadiouꞌ xhamiguluꞌ ni runi ni naluꞌ!
11 Zuluiꞌluꞌ naa neza xtiꞌ guendanabani.
Nabé stale guendanayecheꞌ nga nuu neza luluꞌ;
cueꞌluꞌ nuu ti guendanayecheꞌ qué ziuu dxi guiluxe.