Ca guendanadxabaꞌ xtiꞌ binni
Ni gudixhe xaique xtiꞌ ca binni ruundaꞌ. Ni bicaa David.
14
Ca ni qué riabayú nacaꞌ cadi nuu Diuxi;guiracaꞌ maꞌ binitilucaꞌ;
huayúnicaꞌ stale guendanayuudxuꞌ;
¡guirutiꞌ tu guni guendanachaꞌhuiꞌ!
2 Dede guibáꞌ cayuyadxi Tata Diuxi binni guidxilayú
cayuuyabe pa nuu tuuxa napa guendabiaaniꞌ,
ne pa nuu tuuxa ni cuyubi laabe.
3 Maꞌ guiracaꞌ gucuaacaꞌ neza nadxabaꞌ;
guiracaꞌ maꞌ biuꞌdxuꞌ ladxidoꞌcaꞌ.
¡Maꞌ guirutiꞌ tu runi jneza!
¡Nin lica tobi!
4 Ca binni nadxabaꞌ la? gastiꞌ xpiaanicaꞌ,
rócabe binni xquidxeꞌ casi rócabe gueta,
ca ni qué ruzeeteꞌ lá Tata Diuxi.
5 Zadxíbicaꞌ, zacadíticaꞌ,
tí Diuxi nuuné ca ni ruzuubaꞌ xtiidxaꞌ.
6 Ruxídxicabe ni ribeza ladxidóꞌ binni nadóꞌ;
Tata Diuxi rulá laacabe.
7 ¡Tila náꞌ Diuxi de dani Sión guedandá ni gulá ca binni Israel!
Dxi guchaa Tata Diuxi guendanabani xtiꞌ ca binni xquidxi,
ziecheꞌ ca lisaa Jacob,
ziecheꞌ guidubi guidxi Israel.