Ra riniꞌne binni Diuxi tí gacané laa
10
Xiñee nabé zitu riaanuꞌ, Tata Diuxi,xiñee rucachiluluꞌ ca dxi peꞌ jma riuu binni xizaa.
2 Binni nadxabaꞌ rizabinanda ne xiana ne ranináꞌ binni nazíꞌ;
xisi la? laca laa riaba lu xaléꞌ xtiꞌ.
3 Ca binni nadxabaꞌ la? laca laa ruchá guendanaróꞌ xtiꞌ ladxidóꞌ;
binni nadxii xpidxichi la? riguudí ne riguiñeyú Tata Diuxi.
4 Ruchá bi yanni ne riníꞌ ique:
«Cadi nabani Diuxi.
Guirutiꞌ zanda gabi naa gastiꞌ.»
5 Guiráꞌ ni gúnibe riree ndu.
Zitu ruꞌ zuhuaa xtiidxaluꞌ neza lube,
zitu ruꞌ ruuyabe ni.
Ruxidxibe ca ni nanaláꞌdxibe,
6 ne riníꞌ íquebe, qué ziuu dxi chuꞌ tu gusaba laabe,
qué ziuu dxi chuꞌbe lu ti guendanaxoo.
7 Dxaꞌ tipa di ruaabe,
guendarusiguii ne diidxaꞌ runiná;
xtiidxabe rucaachiꞌ
guendaruxhatanáꞌ ne guendanadxabaꞌ.
8 Ratanabe rucaachilube lade ca guidxi huiiniꞌ,
ne nagaꞌchiꞌ ruutibe binni qué guzaabiꞌ.
Qué ruchachalube binni chibaꞌ,
9 sica ñácabe ti beedxeꞌ nuu ndaaniꞌ lidxi,
cundaachibe binni nazíꞌ,
cabezasibe pora guiababe luguiáꞌ,
ne ra ma gunaazebe laa la? rixubiyube laa
ra nuu guixhe guuzeꞌ xtibe.
10 Ratagudaabe ne ripaaxhube,
tí guiaba tuuxa chibaꞌ lu xhugabe.
11 Guiráꞌ binni nadxabaꞌ ruzuluxacaꞌ rusiaandaꞌ Diuxi,
ruzuluxacaꞌ rutagulube ne qué ruuyabe gastiꞌ.
12 ¡Tata Diuxi, biasa ne gundisanaluꞌ!
¡Qué chi gusiaanduꞌ ca binni cadi nuu dxi ladxidóꞌ!
13 Xiñee Diuxi xtinneꞌ, xiñee cuxiidxi ca ni nadxabaꞌ ca lii,
ruzuluxacaꞌ qué zaguixhebiaꞌluꞌ laacaꞌ.
14 Lii piouꞌ maꞌ biiyuꞌ guendanadxabaꞌ xtícabe;
¡maꞌ biiyuꞌ ni, zuquiꞌxhuꞌ ni laacabe!
Lii nga ruyubi ca binni chibaꞌ;
lii nga racaneuꞌ ca bizabi.
15 ¡Bitagunáꞌ ca binni nadxabaꞌ!
¡Guzabinanda laacabe,
ne biquixe guiráꞌ xixé guendanadxabaꞌ xtícabe!
16 Tata Diuxi nga Xaique roꞌ ni qué ziuu dxi guiluxe guisaca;
¡ca binni qué runibiáꞌ laabe la? zunitilube laaca ndaaniꞌ xquídxibe!
17 Tata Diuxi, lii rucaadiaꞌguꞌ xtiidxaꞌ ca binni nadóꞌ
ne lii rusiécheluꞌ laacaꞌ ne rulábiluꞌ laacaꞌ.
18 Gucané ca bizabi ne ca ni cuxhiicabe laa,
¡ne qué chuꞌruꞌ dxi,
miatiꞌ ni bizaꞌluꞌ de yú, guchibi binni!