Guendariuundaꞌ ra casaca xtiidxaꞌ Diuxi
Ni gudixhe xaique xtiꞌ ca binni ruundaꞌ, ra xhidxi gueereꞌ ne yagalé. Guendaruundaꞌ diidxaguieꞌ bicaa David.
9
Ay Tata Diuxi,racaladxeꞌ gusisacaꞌ lii ne guidubi ladxiduáꞌ,
ne guiniéꞌ guiráꞌ guendaridxagayaa xtiuꞌ.
2 Ay Tata Diuxi,
runi lii racaladxeꞌ gucaaꞌ ridxi nayecheꞌ,
¡racaladxeꞌ guundaꞌ saa yecheꞌ ra cuchayaꞌ naróꞌ xtiuꞌ!
3 Ca ni nanalaꞌdxiꞌ naa ruxooñelucaꞌ neza luluꞌ;
riábacaꞌ ne ráticaꞌ.
4 Lii nga ti xaique ni runi jneza;
ma zubuꞌ lu banguꞌ risaca xtiuꞌ,
tí gusisácaluꞌ xtiidxaluꞌ luguiaꞌyaꞌ.
5 Gudindeneuꞌ ca ni qué runibiáꞌ lii,
binideluꞌ ca ni nadxabaꞌ,
¡ne bixhá couꞌ lácabe lu guidxilayú!
6 Maꞌ guti ca ni nanalaꞌdxiꞌ laanu,
ne ra gúticabe la? biluxe ca xquídxicabe;
lii binideluꞌ cani,
ne guirutiꞌ ruꞌ rietenalaꞌdxiꞌ cani.
7 Tata Diuxi nga naca Xaique roꞌ;
maꞌ bizuhuaa dxiichibe ra cuibe laga ganda dxi quixhebiaꞌbe binni;
8 zusabanabe guidxilayú ne diidxaꞌ jneza,
ne jneza nga quixhebiaꞌbe xtóndacaꞌ.
9 Tata Diuxi nga rapa ca binni cuxhiicabe laa;
ne laabe nga rápabe ca ni cadiꞌdiꞌ lu guendanagana.
10 Tata Diuxi,
ca ni racabiaꞌ lii, ricaacaꞌ xtiidxaluꞌ,
tí ca ni ruyubi lii, qué rusaanuꞌ laacaꞌ stúbicaꞌ.
11 Laguundaꞌ stale saa nayecheꞌ xtiꞌ Tata Diuxi, Xaique roꞌ xtiꞌ Sión;
lagucheeche xtiidxabe ndaaniꞌ guiráꞌ ca guidxi ca.
12 Diuxi rietenalaꞌdxiꞌ ca ni nuu xizaa ladxidóꞌ,
ne qué rusiaandaꞌ diꞌ xhiuubacabe;
ne rusabanabe ca ni cayutuñee laaca.
13 Bilaselaꞌdxiꞌ naa Tata Diuxi,
biiyaꞌ pabiáꞌ cayuniná ca ni nanalaꞌdxiꞌ naa ca.
¡Gulee naa lu náꞌ guendaguti!
14 Ne zacá zuzuhuaaꞌ ruaa guidxi Jerusalén,
ne zabeꞌ guiráꞌ binni, lii nga naquiiñeꞌ gusisácacaꞌ,
ne nayecheꞌ nuaaꞌ tí maꞌ bilaluꞌ naa.
15 Ca ni qué runibiáꞌ xtiidxaluꞌ la?
laca laacaꞌ riábacaꞌ lu xtóndacaꞌ;
rirenda ñeecaꞌ lade doo
ni gudixhecaꞌ gusabanecaꞌ binni.
16 Tata Diuxi maꞌ biluíꞌ tu naca;
¡ne maꞌ biꞌniꞌ jneza!
Binni nadxabaꞌ la? laca laa riaaba lu xtonda.
17 Ca ni nadxabaꞌ ne ca ni qué runibiáꞌ xtiidxaꞌ Diuxi,
ca ni rusiaandaꞌ laabe la?
zaluxecaꞌ lu náꞌ guendaguti;
18 ne qué ziuu dxi guiaandaꞌ ca ni nazíꞌ xquendanabani,
ne qué zanitilú guendaribeza xtícabe.
19 Tata Diuxi, biasa;
ne cadi guyadxisiouꞌ ca ni ruchá bi yanni;
¡bisabanáꞌ ca ni qué runibiáꞌ lii ca, neza luluꞌ!
20 Tata Diuxi, guluu dxiibi ndaaniꞌ ladxidóꞌcabe,
¡tí gánnacabe binni guidxilayú nga laacabe!