Tata Diuxi nga ti xaique roꞌ ni runi jneza
Guendaricaalaꞌdxiꞌ xtiꞌ David, ra biꞌndaꞌ neza lú Tata Diuxi, runi Cus, lisaa Benjamín.
7
1-2 Tata Diuxi, Diuxi xtinneꞌ lii nga cá luaꞌ gulaluꞌ naa;¡bilá naa lu náꞌ ca ni canazabinanda naa!
¡Bilá naa tí laacabe zeda gácacabe casi beedxeꞌ;
cadi mala guxuuxecabe naa pa qué chuꞌ tuuxa gulá naa!
3 Tata Diuxi xtinneꞌ, paraa bicheeꞌ yaꞌ,
biabaꞌ xaꞌ lu xiixa donda.
4 Ñee huacheeniáꞌ tuuxa xhamiguaꞌ la?
Ñee huayanenayasiáꞌ ca ni nanalaꞌdxiꞌ naa la?
5 Ne pa nga ni la? ca ni nanalaꞌdxiꞌ naa guizabinanda naa;
gugaanda naa, xhubiyú naa,
quiñeyú naa, guguuchaꞌ guixi xquendaꞌ.
6 ¡Tata Diuxi, biasa ne xtale xiana!
¡Bicueeza xiana xtiꞌ ca ni nanalaꞌdxiꞌ naa!
Lii nga guniꞌluꞌ, zuꞌnuꞌ jneza,
¡guca tóbisi ne naa!
7 Guyuu galahuiꞌ guiráꞌ xixé ca guidxi
ne gurí ladecaꞌ ra jma nasoo.
8 Tata Diuxi lii rulídxiluꞌ guiráꞌ guidxi roꞌ.
Bilidxi naa lu guendanachaꞌhuiꞌ xtinneꞌ;
bilidxi naa pa cuchee.
9 Diuxi ni runi jneza, lii nannu xi ná xquendabiaaniꞌ binni
ne xi gaꞌchiꞌ ndaaniꞌ ladxidóꞌ,
¡bicueeza lu guiráꞌ guendanadxabaꞌ xtiꞌ ca ni qué guiquiiñeꞌ,
ne bizuhuaa dxiichiꞌ binni nachaꞌhuiꞌ!
10 Diuxi ni nandxóꞌ nga rapa naa,
laabe rulabe binni nayá ladxidóꞌ.
11 Diuxi nga xaique roꞌ ni runi jneza;
laabe raninabe guendanadxabaꞌ dxi gueelaꞌ.
12 Pa binni qué guyubi Diuxi la?
Diuxi zutuxhu xquiibaꞌ;
maꞌ zutipa bazaa xtibe,
13 ne ma nuzaabibe bazandíꞌb guí xtibe,
¡ne maꞌ gudixhechaahuibe ca guiibaꞌ ruuti xtibe!
14 Laguuyaꞌ ni qué guiquiiñeꞌ ca maꞌ cayuubaꞌ ndaaniꞌ
nacaxiiñiꞌ guendanadxabaꞌ,
zaxanaꞌ guendarusiguii.
15 Gundaabe ti baꞌ gueteꞌ,
ne laca laabe guiababe ndaaniꞌ ni.
16 ¡Guendanadxabaꞌ ne guendanaxoo xtibe
laaca íquebe guiabacani!
17 Zusisacaꞌ Tata Diuxi tí laa runi jneza;
zuundaꞌ saa ra cusisacaꞌ lá Tata Diuxi ni nandxóꞌ.