Ra cuzulunu dxi ne Diuxi
Ni gudixhe xaique xtiꞌ ca binni ruundaꞌ, ra xhidxi gueereꞌ. Guendaruundaꞌ diidxaguieꞌ bicaa David.
5
1-2 Tata Diuxi, Xaique roꞌ xtinneꞌ,bicaadiaga xtiidxaꞌ,
bilabi ca guendariguliibi xtinneꞌ,
ne bicaadiaga ca ni canabaꞌ lii,
lii siouꞌ nga zanda gucaaꞌ ridxi.
3 Siadóꞌ guieꞌ ruꞌ maꞌ canieniáꞌ lii,
ne maꞌ cayabeꞌ lii xi cazaacaꞌ,
ne ribezaꞌ guicabiluꞌ naa.
4 Lii nacuꞌ ti Diuxi qué riuulaꞌdxiꞌ guendanadxabaꞌ,
ca ni qué iquiiñeꞌ qué zandadiꞌ guibánicaꞌ cueꞌluꞌ,
5 neza luluꞌ qué zanda diꞌ guzuhuaa ca ni ruchá bi yanni.
Lii qué racalaꞌdxiꞌluꞌ ca binni runi guendanadxabaꞌ,
6 lii runitiluluꞌ ca ni rusiguii,
ne rucaanouꞌ ca binni rudxii deche ne ca ni ruutiꞌ,
7 runi nadxiiuꞌ naa stale nga,
randa riuaaꞌ ndaaniꞌ yuꞌduꞌ xtiluꞌ;
¡randa ranaxhieeꞌ lii ne ruzuxibeꞌ xa ñeeluꞌ,
ne ruuyadxiéꞌ yuꞌduꞌ nandxóꞌ xtiluꞌ!
8 Tata Diuxi, runi ca ni nanalaꞌdxiꞌ naa,
gucané naa guneꞌ ni jneza;
biluíꞌ naa neza sayaꞌ.
9 ¡Nayuudxuꞌ ladxidóꞌcabe!
Qué riníꞌcabe ni dxandíꞌ,
baꞌ yannicabe zedagaca casi ti baꞌ zuxeleꞌ,
¡lúdxicabe nabé rusiguii!
10 ¡Bisabanáꞌ laacabe, Diuxi xtinneꞌ!
¡Biiyaꞌ cadi guiree ndu ni cá íquecabe gúnicabe!
Bicaanáꞌ laacabe runi guiráꞌ donda xtícabe,
tí cayásacabe luguialuꞌ.
11 Guiecheꞌ ca ni cuyubi gulalu laacaꞌ;
gúꞌndacaꞌ ne stale guendanayecheꞌ,
lii rápaluꞌ laacaꞌ;
ca ni nadxii lii la? riechenecaꞌ lii.
12 Lii Tata Diuxi, riguuluꞌ ndaayaꞌ ca ni ruzuuba xtiidxaluꞌ;
guendanachaꞌhuiꞌ xtiuꞌ riguu leꞌ laacabe ne rapa laacabe.